బీసీ హక్కుల కోసం బలైన బీసీ బిడ్డ!
రాజ్యాధికారం కోసం అగ్గి రాజేసిన సాయి ఈశ్వర చారి త్యాగం!
42% రిజర్వేషన్ గాలిమాటలకే బలి! బీసీల హక్కులను మరిచిన కాంగ్రెస్
మలిదశ బీసీ ఉద్యమం తక్షణ కర్తవ్యం : టీఆర్పీ యువ నాయకులు వరిపల్లి అనిల్ కుమార్
మహబూబాబాద్ – తెలంగాణ గడ్డ: తెలంగాణ రాష్ట్రం కోసం శ్రీకాంత్ చారి ప్రాణ త్యాగం చేసిన పోరాట నేల ఇది. అదే గడ్డపై, ఇప్పుడు బీసీ రాజ్యాధికార హక్కుల కోసం పోరాటం చేస్తున్న యువకుడు సాయి ఈశ్వరా చారి ఆత్మబలిదానం రాష్ట్ర రాజకీయాలను, బీసీ సమాజాన్ని కదిలించింది. కీలకమైన బీసీ సమస్యలపై ప్రభుత్వాల నిర్లక్ష్యం పతాక స్థాయికి చేరిన నేపథ్యంలో, ఈ విషాద ఘటన రాష్ట్రవ్యాప్తంగా పెను సంచలనాన్ని సృష్టించింది. గాంధీ ఆసుపత్రిలో చికిత్స పొందుతూ సాయి చారి కన్నుమూయడం, బీసీ సమాజానికి జరిగిన తీరని అన్యాయానికి పరాకాష్టగా నిలిచింది.
మలిదశ ఉద్యమ శంఖారావం!
ఈ విషాదంపై టీఆర్పీ రాష్ట్ర యువ నాయకులు వరిపల్లి అనిల్ కుమార్ స్పందిస్తూ, అధికార పార్టీలపై అక్షరాలా అగ్గి రాజుకున్నారు. “తెలంగాణ కోసం శ్రీకాంత చారి, ఇప్పుడు బీసీల కోసం సాయిఈశ్వరా చారి! బీసీలకు జరుగుతున్న అన్యాయం, వారి హక్కుల హరణం ఎంత తీవ్రంగా ఉందో ఈ యువకుడి త్యాగం ప్రపంచానికి తెలియజేస్తోంది. ఇది కేవలం ఒక ఆత్మహత్య కాదు, ప్రభుత్వ నిర్లక్ష్యానికి బలైన బీసీల ఆవేదన!” అని ఆయన నిప్పులు చెరిగారు. ఆత్మబలిదానానికి దారితీసిన కాంగ్రెస్ వైఖరి!
కాంగ్రెస్ పార్టీ ఎన్నికల ముందు ఎంతో ఆర్భాటంగా 42 శాతం బీసీ రిజర్వేషన్లు ఇస్తామని హామీ ఇచ్చి, అధికారంలోకి వచ్చాక పూర్తిగా మాట మార్చిందని అనిల్ కుమార్ ఆరోపించారు. ఈ మోసపూరిత వైఖరి, తమకు అన్యాయం కొనసాగుతుందనే తీవ్ర నిరాశకు గురి చేసిందని, దీంతో మానసికంగా కుంగిపోయిన సాయి చారి ఈ అత్యంత దురదృష్టకర నిర్ణయం తీసుకున్నాడని ఆయన కాంగ్రెస్ పార్టీని తీవ్రంగా విమర్శించారు.
బీసీ బిల్లును షెడ్యూల్ 9లో చేర్చాలి!
ఇప్పుడైనా బీసీ సమాజం మేల్కోవాలని, సాయి ఈశ్వరా చారి త్యాగాన్ని వృథా చేయకుండా సంఘటితం కావాలని వరిపల్లి అనిల్ కుమార్ పిలుపునిచ్చారు.
బీసీల రాజకీయ, విద్యా,ఉద్యోగ, సామాజిక హక్కులను దెబ్బతీస్తున్న కాంగ్రెస్, బిజెపి పార్టీలను ప్రజాస్వామ్య పద్ధతిలో, ఓటుతో బొంద పెట్టాలి!” అని ఆయన తీవ్ర స్థాయిలో పిలుపునిచ్చారు.
కేంద్ర ప్రభుత్వం వెంటనే పార్లమెంటు శీతాకాల సమావేశాల్లో బీసీ బిల్లును ప్రవేశపెట్టాలని, ఈ రిజర్వేషన్లను తొమ్మిదవ షెడ్యూల్లో చేర్చడం ద్వారా రాజ్యాంగ పరమైన శాశ్వత పరిరక్షణ కల్పించాలని ఆయన గట్టిగా డిమాండ్ చేశారు. “సాయి ఈశ్వరా చారి త్యాగం ఒక హెచ్చరిక! బీసీ యువత ఇకపై ఉద్యమ సారథులుగా మారి, మలిదశ బీసీ పోరాటం ప్రారంభించాలి!” అని అనిల్ కుమార్ స్పష్టం చేశారు.
