ఏపీ మంత్రివ‌ర్గంలోని మొత్తం 24 మంది మంత్రులు త‌మ మంత్రి ప‌ద‌వుల‌కు రాజీనామాలు చేసేసిన సంగ‌తి తెలిసిందే. గురువారం మ‌ధ్యాహ్నం ఏపీ స‌చివాలయంలో జ‌రిగిన కేబినెట్ భేటీలో జ‌గ‌న్ ఆదేశించగానే.. మంత్రులంతా మూకుమ్మ‌డిగా ప‌ద‌వుల‌కు రాజీనామాలు చేశారు. ఆ త‌ర్వాత కేబినెట్ భేటీ ముగియ‌గా.. దాదాపు మంత్రులంతా ఇళ్ల‌కు బ‌య‌లుదేరారు.

అయితే, న‌లుగురు మంత్రులు మాత్రం సీనియ‌ర్ మంత్రి బొత్స స‌త్య‌నారాయ‌ణ కేబిన్ ‌లో ప్ర‌త్యేకంగా స‌మావేశ‌మైనట్టు తెలుస్తోంది. ఈ భేటీలో బొత్స‌తో పాటు అవంతి శ్రీనివాస్‌, క‌న్న‌బాబు, తానేటి వ‌నిత పాల్గొన్నారు. ఈ భేటీలో వారు తాజా ప‌రిణామాలపై ప్ర‌ధానంగా చ‌ర్చించిన‌ట్టు స‌మాచారం.

అంతేకాకుండా కొత్త కేబినెట్‌లో ప్ర‌స్తుతం రాజీనామా చేసిన వారిలో ఓ ఐదారుగురు ఉండే అవ‌కాశం ఉంద‌ని సీఎం చెప్ప‌డంతో వారు ఎవ‌ర‌న్న దానిపై కూడా ఈ భేటీలో మంత్రులు చ‌ర్చించినట్టు స‌మాచారం. ఓ అర‌గంట పాటు దీనిపై చ‌ర్చించిన త‌ర్వాత మిగిలిన మంత్రుల మాదిరిగానే ఈ న‌లుగురు మంత్రులు కూడా ఇంటి బాట ప‌ట్టారు.