మూడురోజులపాటు దేశ రాజకీయ కేంద్రంగా హైద్రాబాద్ మహానగరం…
-కేంద్ర క్యాబినెట్ ..19 రాష్ట్రాల ముఖ్యమంత్రులు భాగ్యనగరంలో మకాం
-ప్రతిపక్షాల రాష్ట్రపతి అభ్యర్థి యస్వంత్ సిన్హా సైతం రేపు నగరానికి రాక
-ఇప్పటికే దేశ రాజకీయాలపై ఫోకస్ పెట్టిన కేసీఆర్
-వివిధ రాష్ట్రాల నుంచి చేరుకుంటున్న బీజేపీ ముఖ్యనేతలు
-వారి ఏర్పాట్లలో నిమగ్నమైన స్థానిక నేతలు
-హైద్రాబాద్ అంత పోస్టర్లు జెండాల మయం
మూడురోజుల పాటు హైద్రాబాద్ మహానగరం దేశ రాజకీయ కేంద్రం గా మారబోతుంది…బీజేపీ జాతీయసమావేశాలకు భాగ్యనగరం ఆతిధ్యం ఇవ్వబోతుంది. దీంతో ప్రధాని నరేంద్రమోడీ తో సహా అమిత్ షా , బీజేపీ అధ్యక్షుడు జెపి నడ్డా , 19 రాష్ట్రాల ముఖ్యమంత్రులు , పలువురు కేంద్ర మంత్రులు వందలాదిగా ఎంపీలు ఎమ్మెల్యేలు ఎమ్మెల్సీలు ఇతర ప్రజా ప్రతినిధులు , మహానగరంలో బస చేయనున్నారు . దీంతో ఒక్కసారిగా జాతీయ , అంతర్జాతీయ మీడియా సైతం హైద్రాబాద్ నగరం పై ఫోకస్ పెట్టింది. మీడియా ప్రతినిధులు కూడా హైద్రాబాద్ చేరుకున్నారు . ఒక రకంగా చెప్పాలంటే హైద్రాబాద్ నగరం కాషాయమయం అయింది. ప్రధాని కేంద్ర క్యాబినెట్ మొత్తం ఇక్కడే ఉండటం తో కేంద్ర సచివాలయం కూడా ఇక్కడ నుంచే పనిచేయనుంది. అందుకు అవసరమైన ఏర్పాటు చేసుకున్నారు . ఇందుకు రాజ్ భవన్ తోపాటు , నోవాటెల్ హోటల్ ను ఎంచుకున్నారు .
యస్వంత్ సిన్హా హైద్రాబాద్ రాక …
రాష్ట్రపతి ఎన్నికల్లో ప్రతిపక్షాల అభ్యర్థిగా పోటీచేస్తున్న యస్వంత్ సిన్హా ప్రచారం లో భాగంగా ఇక్కడ టీఆర్ యస్ కాంగ్రెస్ ప్రజాప్రతినిధులను కలుసుకునేందుకు రేపు హైద్రాబాద్ వస్తున్నారు . బేగంపేట ఎయిర్ పోర్టు నుంచి జలవిహార్ వరకు పెద్ద ఎత్తున టీఆర్ యస్ ప్రదర్శనకు ఏర్పాటు చేసింది. సిన్హా ను స్వయంగా సీఎం కేసీఆర్ రిసీవ్ చేసుకుంటారు . బీజేపీ జాతీయసమావేశాలు , ప్రతిపక్షాల రాష్ట్రపతి అభ్యర్థి ఒకేరోజు నగరంలో ఉండటంతో రాజకీయ ప్రాధాన్యత ఏర్పడింది. ఇప్పటికే బీజేపీ ,టీఆర్ యస్ లమధ్య పోస్టర్ల యుద్ధం ప్రారంభమైంది. దీనికి తోడు రాష్ట్రపతి అభ్యర్థి ప్రచారం తో ఆసక్తి నెలకొన్నది .
జాతీయ రాజకీయాలపై కేసీఆర్ ఫోకస్ …
జాతీయ రాజకీయాలపై ఫోకస్ పెట్టిన కేసీఆర్ ప్రతి అంశాన్ని తనకు అనుకూలంగా వినియోగించుకొనే చాతుర్యం ప్రదర్శిస్తారు . అందులో భాగంగానే కేంద్రం రాష్ట్రానికి చేసిన అన్యాయాలపై పోస్టర్లు హోర్డింగ్ లద్వారా ప్రచారం చేస్తున్నారు . దానికి ప్రతిగా బీజేపీ రాష్ట్రానికి ఇచ్చిన వాటిపై ప్రచారం చేస్తుంది. రెండు పార్టీలమధ్య జరుగుతున్నా యుద్ధం రేపు రాబోయే రాజకీయాలను ప్రభావితం చేస్తుందని రాజకీయ పరిశీలకులు అంటున్నారు .
కేసీఆర్ పై బీజేపీ మండిపాటు …
తమ సమావేశాలు జరుగుతుండగా తమకు వ్యతిరేక ప్రచారం చేస్తున్న టీఆర్ యస్ పై కేసీఆర్ పై బీజేపీ నేతలు మంది పడుతున్నారు . ఇక సాలు దొరా…సెలవు దొరా అంటూ వెలసిన పోస్టర్లు చర్చనీయాంశంగా మారాయి.
3 న ప్రధాని బహిరంగ సభ పై బీజేపీ విస్తృత ప్రచారం ….
బీజేపీ సమావేశాల సందర్భంగా హైద్రాబాద్ లో పెద్ద బహిరంగసభను ఏర్పాటుచేశారు . ఇందులో ప్రధాని నరేంద్ర మోడీ పాల్గొంటారు . దీంతో 10 లక్షల మందిని ఈ సభకు సమీకరించాలని లక్ష్యం తో రాష్ట్రంలోని అన్ని జిల్లాలకు దేశంలోని వివిధ ప్రాంతాలకు చెందిన బీజేపీ ముఖ్యనేతలను పరిశీలకులుగా పంపారు . వారు వివిధ ప్రాంతాలలో పర్యటించి మోడీ సభకు రావాలని పిలుపు నిస్తున్నారు . పెద్ద ఎత్తున వాహనాలు , ట్రైన్స్ కూడా ఏర్పాటు చేశారు . దీన్ని ప్రతిష్టాత్మకంగా తీసుకున్నారు . రేపు జరగబోయే ఎన్నికలకు ఒకరకంగా శంఖారావం పూరించేందుకు బీజేపీ సిద్ధమౌతోంది. దీంతో హైద్రాబాద్ నగరం వైపు దేశం చూపు పడింది….రాజకీయ కేంద్రంగా హైద్రాబాద్ మారింది.
