- పహల్గామ్ దాడికి భారత్ ప్రతీకారం; “ఆపరేషన్ సిందూర్”
- పాక్, పీఓకేలో 9 ఉగ్ర స్థావరాలపై భారత త్రివిధ దళాల దాడి
- దాడులు ధృవీకరించిన పాక్; ముగ్గురు మృతి, 12 మందికి గాయాలు
- బదులిస్తామన్న పాక్ ప్రధాని; సరిహద్దుల్లో కాల్పులు
- విమానాశ్రయాల మూసివేత; అమెరికా ఆందోళన
పహల్గామ్ ఉగ్రదాడి ఘటనతో రగులుతున్న భారత్, పాకిస్థాన్ల మధ్య ఉద్రిక్తతలు మరింత తీవ్రస్థాయికి చేరాయి. ఉగ్రదాడికి ప్రతీకారంగా భారత సైన్యం మంగళవారం అర్ధరాత్రి పాకిస్థాన్ భూభాగంలోని ఉగ్రవాద శిబిరాలపై మెరుపు దాడులు నిర్వహించింది. “ఆపరేషన్ సిందూర్” పేరుతో చేపట్టిన ఈ చర్యతో ఇరు దేశాల మధ్య యుద్ధ వాతావరణం నెలకొంది.
పహల్గామ్ దాడిలో అమరులైన వారికి న్యాయం చేసేందుకు కట్టుబడి ఉన్నామని ప్రకటించిన భారత్, ఆ దిశగా కఠిన చర్యలు చేపట్టింది. మంగళవారం అర్ధరాత్రి దాటిన తర్వాత 1:44 గంటల సమయంలో భారత ఆర్మీ, వాయుసేన, నౌకాదళాలు సంయుక్తంగా “ఆపరేషన్ సిందూర్”ను ప్రారంభించాయి. ఈ ఆపరేషన్లో భాగంగా పాక్ ఆక్రమిత కశ్మీర్తో పాటు పాకిస్థాన్లోని పలు ప్రాంతాల్లో నెలకొల్పిన ఉగ్రవాద మౌలిక సదుపాయాలే లక్ష్యంగా క్షిపణులతో విరుచుకుపడ్డాయి. మొత్తం తొమ్మిది ఉగ్ర స్థావరాలను అత్యంత కచ్చితత్వంతో ధ్వంసం చేసినట్లు భారత ప్రభుత్వం వెల్లడించింది. అయితే, పాకిస్థాన్ సైనిక స్థావరాలపై ఎలాంటి దాడులు చేయలేదని, ఉద్రిక్తతలు పెంచే ఉద్దేశ్యం తమకు లేదని స్పష్టం చేసింది. ఈ దాడుల నేపథ్యంలో పలువురు కేంద్ర మంత్రులు, ప్రముఖులు సోషల్ మీడియాలో ‘భారత్ మాతా కీ జై’ అంటూ పోస్టులు చేయడం గమనార్హం. దాడులకు సంబంధించిన పూర్తి వివరాలను త్వరలో వెల్లడిస్తామని రక్షణ శాఖ ప్రకటించగా, “న్యాయం జరిగింది” అని భారత సైన్యం ‘ఎక్స్’ వేదికగా పేర్కొంది.
పాకిస్థాన్ స్పందన, ప్రతిచర్యలు:
భారత దాడులను పాకిస్థాన్ సైన్యం ధృవీకరించింది. పాక్ డీజీ ఐఎస్పీఆర్ లెఫ్టినెంట్ జనరల్ అహ్మద్ షరీఫ్ చౌదరి మాట్లాడుతూ, కొట్లీ, మురిడ్కే, బహవల్పూర్, ముజఫరాబాద్ ప్రాంతాల్లో దాడులు జరిగాయని తెలిపారు. ఈ దాడుల్లో ముగ్గురు మరణించారని, మరో 12 మంది గాయపడ్డారని పాక్ ఆర్మీ ప్రకటించింది. సమయం చూసి భారత్కు తగిన రీతిలో బదులిస్తామని, “భారత్ తాత్కాలిక ఆనందాన్ని శాశ్వత దుఃఖంతో భర్తీ చేస్తాం” అని ఆయన హెచ్చరించారు.
భారత దాడులపై పాకిస్థాన్ ప్రధాని షెహబాజ్ షరీఫ్ తీవ్రంగా స్పందించారు. “మోసపూరిత శత్రువు పాకిస్థాన్లోని ఐదు ప్రాంతాల్లో దాడులు చేసింది. ఈ చర్యలకు పాకిస్థాన్ కచ్చితంగా బదులు తీర్చుకుంటుంది. ఈ సమయంలో పాక్ సైన్యం వెంట దేశమంతా నిలబడి ఉంది. శత్రువును ఎలా ఎదుర్కోవాలో పాకిస్థాన్కు, ఆర్మీకి తెలుసు. ప్రత్యర్థి దుష్ట ప్రణాళికలను ఎట్టి పరిస్థితుల్లోనూ నెరవేరనీయం” అని ‘ఎక్స్’లో పోస్ట్ చేశారు. ఈ దాడులను ఆయన ‘యుద్ధ చర్య’గా అభివర్ణించారు. పాక్ ప్రధాని ప్రకటన అనంతరం, సరిహద్దులోని పూంఛ్, రాజౌరి సెక్టార్లలో పాక్ సైన్యం కాల్పులకు తెగబడటంతో, భారత దళాలు కూడా ప్రతిగా కాల్పులు జరిపాయి. దీంతో నియంత్రణ రేఖ వెంబడి ఉద్రిక్త వాతావరణం నెలకొంది. దాడులు జరిగిన ప్రాంతాల్లో ఒకటైన మురిడ్కే లష్కరే తొయిబా ఉగ్ర సంస్థకు ప్రధాన కేంద్రంగా ఉండగా, పంజాబ్ ప్రావిన్స్లోని బహవల్పూర్లో మసూద్ అజార్ నేతృత్వంలోని జైష్-ఎ-మహ్మద్ స్థావరం ఉంది.
అంతర్జాతీయ స్పందన, భద్రతా చర్యలు:
భారత్ దాడులతో అప్రమత్తమైన పాకిస్థాన్, లాహోర్, సియాల్కోట్ విమానాశ్రయాలను 48 గంటల పాటు మూసివేసింది. మరోవైపు, భారత జాతీయ భద్రతా సలహాదారు అజిత్ దోవల్ అమెరికా జాతీయ భద్రతా సలహాదారు మార్కో రూబియోతో ఫోన్లో మాట్లాడి, దాడుల సమాచారాన్ని వివరించినట్లు తెలిసింది. దాడుల అనంతరం భారత వాయు రక్షణ వ్యవస్థలు అప్రమత్తమయ్యాయి. పాక్ నుంచి ఎలాంటి ప్రతిస్పందన ఎదురైనా నిలువరించేందుకు సరిహద్దుల వెంట ఎయిర్డిఫెన్స్ వ్యవస్థలను మోహరించారు. భారత్లోని శ్రీనగర్, జమ్ము, అమృత్సర్, ధర్మశాల, లేహ్ విమానాశ్రయాలను కూడా ముందు జాగ్రత్త చర్యగా మూసివేసినట్లు సమాచారం. బుధవారం ఉదయం 10.30 గంటలకు పాక్ ప్రధాని షెహబాజ్ షరీఫ్ జాతీయ భద్రతా కమిటీతో సమావేశం కానున్నారు.
ఈ పరిణామాలపై అమెరికా అధ్యక్షుడు డొనాల్డ్ ట్రంప్ స్పందిస్తూ, ఇండియా-పాకిస్థాన్ పరిస్థితి దారుణంగా ఉందని, ఇరు దేశాలు ఉద్రిక్తతలు తగ్గించుకోవాలని సూచించారు. “ఇది హేయమైన విషయం. వారు దశాబ్దాలుగా ఘర్షణ పడుతున్నారు. దీనికి వీలైనంత తొందరగా ముగింపు పలకాలి. ప్రపంచానికి శాంతి కావాలి, ఘర్షణలు వద్దు” అని ఆయన వ్యాఖ్యానించారు. దేశ వ్యాప్తంగా బుధవారం కేంద్ర ప్రభుత్వం మాక్ డ్రిల్స్ నిర్వహించ తలపెట్టిన తరుణంలో ఈ దాడులు జరగడం ప్రాధాన్యతను సంతరించుకుంది.
‘ఆపరేషన్ సిందూర్’.. 80 మంది ఉగ్రవాదుల హతం!
- పాక్, పీవోకేలోని 9 ఉగ్ర స్థావరాలపై భారత సాయుధ బలగాల మెరుపుదాడులు
- పహల్గామ్ దాడికి ప్రతీకారంగా జైషే, లష్కరే, హిజ్బుల్ టెర్రర్ క్యాంపులే లక్ష్యం
- బహవల్పూర్, మురిడ్కే స్థావరాల్లోనే 50-60 మంది ఉగ్రవాదులు హతం
- భారత్ ‘న్యాయం జరిగింది’ అంటే.. ‘యుద్ధ చర్య’ అంటున్న పాక్
జమ్మూకశ్మీర్లోని పహల్గామ్లో ఏప్రిల్ 22న జరిగిన ఉగ్రదాడికి ప్రతీకారంగా భారత సాయుధ దళాలు బుధవారం తెల్లవారుజామున పాకిస్థాన్, పాక్ ఆక్రమిత కశ్మీర్ (పీవోకే)లోని ఉగ్రవాద శిబిరాలపై విరుచుకుపడ్డాయి. ‘ఆపరేషన్ సిందూర్’ పేరిట నిర్వహించిన ఈ కచ్చితమైన దాడుల్లో 80 మందికి పైగా ఉగ్రవాదులు హతమైనట్లు అత్యున్నత స్థాయి భద్రతా వర్గాలు వెల్లడించాయి. ఈ ఘటనతో ఇరు దేశాల సరిహద్దుల్లో తీవ్ర ఉద్రిక్తత నెలకొంది.
నిషేధిత ఉగ్రవాద సంస్థలైన జైషే మహమ్మద్ (జేఈఎం), లష్కరే తోయిబా (ఎల్ఈటీ), హిజ్బుల్ ముజాహిదీన్లకు చెందిన మొత్తం తొమ్మిది స్థావరాలను లక్ష్యంగా చేసుకుని ఈ దాడులు జరిగాయి. పహల్గామ్లో 26 మంది అమాయక పౌరుల మృతికి కారణమైన దాడికి ప్రతిచర్యగానే ఈ ఆపరేషన్ చేపట్టినట్లు తెలుస్తోంది.
అధికార వర్గాల సమాచారం ప్రకారం.. జైషే మహమ్మద్కు బలమైన పట్టున్న బహవల్పూర్, లష్కరే తోయిబా కీలక కేంద్రమైన మురిడ్కేలోని మసీద్ వా మర్కజ్ తైబాపై జరిగిన దాడుల్లో అత్యధికంగా నష్టం వాటిల్లింది. ఈ రెండు ప్రాంతాల్లోనే సుమారు 25 నుంచి 30 మంది చొప్పున ఉగ్రవాదులు హతమైనట్లు అంచనా. మురిడ్కేలోని స్థావరం పాకిస్థాన్లో ‘ఉగ్రవాద నర్సరీ’గా, లష్కరే సైద్ధాంతిక ప్రధాన కార్యాలయంగా దీర్ఘకాలంగా పరిగణిస్తున్నారు. లక్షిత దాడులకు గురైన ఇతర ప్రాంతాల్లో మృతుల సంఖ్యను నిఘా సంస్థలు ఇంకా ధ్రువీకరిస్తున్నాయి. ప్రాథమిక అంచనాల ప్రకారం మొత్తం 80 నుంచి 90 మంది ఉగ్రవాదులు హతమై ఉంటారని భావిస్తున్నారు.
ఈ దాడుల్లో ఉగ్రవాదులను సరిహద్దు దాటించేందుకు వినియోగించే లాంచ్ ప్యాడ్లు, శిక్షణా కేంద్రాలు, యువతను ఉగ్రవాదం వైపు మళ్లించే కేంద్రాలు ధ్వంసమైనట్లు సమాచారం. ఐక్యరాజ్యసమితి ఆంక్షలు విధించిన జైషే మహమ్మద్, లష్కరే తోయిబా సంస్థలే ఈ కేంద్రాలను నిర్వహిస్తున్నాయి.
దాడుల అనంతరం, భారత సైన్యం ‘ఎక్స్’లో ఒక వీడియోను విడుదల చేస్తూ ‘న్యాయం జరిగింది’ అని ఓ సందేశాన్ని పోస్ట్ చేసింది. అయితే, ఈ దాడులను పాకిస్థాన్ తీవ్రంగా ఖండించింది. ఇది ‘నిస్సిగ్గుగా చేసిన యుద్ధ చర్య’ అని అభివర్ణించింది. ఈ దాడుల్లో ఒక చిన్నారితో సహా ఎనిమిది మంది పౌరులు మరణించారని ఆరోపించింది.
లక్షిత దాడులకు గురైన ఇతర ప్రాంతాలలో జైషే మహమ్మద్కు చెందిన తెహ్రా కలాన్లోని సర్జల్, కోట్లీలోని మర్కజ్ అబ్బాస్, ముజఫరాబాద్లోని సయ్యద్నా బిలాల్ క్యాంప్ ఉన్నాయి. అలాగే, లష్కరే తోయిబాకు సంబంధించిన బర్నాలాలోని మర్కజ్ అహ్లే హదీస్, ముజఫరాబాద్లోని శ్వవాయ్ నల్లా క్యాంప్లపై కూడా దాడులు జరిగాయి. హిజ్బుల్ ముజాహిదీన్కు చెందిన కోట్లీలోని మకజ్ రహీల్ షాహిద్, సియాల్కోట్లోని మెహమూనా జోయా శిక్షణ కేంద్రాలు కూడా ధ్వంసమైన వాటిలో ఉన్నాయి.
మొత్తం తొమ్మిది లక్షిత స్థావరాల్లో నాలుగు పాకిస్థాన్ భూభాగంలో ఉండగా, మిగిలిన ఐదు పీవోకేలో ఉన్నాయి. ఈ దాడుల్లో పాకిస్థాన్ సైనిక స్థావరాలను లక్ష్యంగా చేసుకోలేదని అధికారులు స్పష్టం చేశారు. అయితే, ఉగ్రవాద శిక్షణ మౌలిక సదుపాయాలకు పాక్ సైన్యం, ఐఎస్ఐ, స్పెషల్ సర్వీసెస్ గ్రూప్ (ఎస్ఎస్జీ) వర్గాలు మద్దతునిస్తున్నాయని ఆరోపణలున్నాయి.
ఈ దాడుల అనంతరం, పాకిస్థాన్ దళాలు జమ్మూకశ్మీర్లోని నియంత్రణ రేఖ (ఎల్వోసీ), అంతర్జాతీయ సరిహద్దు (ఐబీ) వెంబడి భారీగా కాల్పులకు, మోర్టార్ల దాడులకు తెగబడ్డాయి. ఈ కాల్పుల్లో ముగ్గురు భారతీయ పౌరులు మరణించినట్లు అధికారులు తెలిపారు. భారత భద్రతా దళాలు కూడా దీటుగా స్పందించాయి. తాజా సమాచారం అందేసరికి ఇరువైపులా కాల్పులు కొనసాగుతూనే ఉన్నాయి.
