- ఢిల్లీ కోర్టులో హత్య కేసు విచారణలో విచిత్ర ఘటన
- నిందితుడైన డాక్టర్ నేలపై బియ్యం చల్లడంతో కలకలం
- చేతబడి చేశాడని అనుమానించిన న్యాయవాదులు, ఆగిన విచారణ
- డాక్టర్ కు రూ. 2,000 జరిమానా విధించిన కోర్టు
- కోర్టు సమయం వృథా చేశారని, గౌరవానికి భంగం కలిగించారని జడ్జి ఆగ్రహం
దేశ రాజధాని ఢిల్లీలోని తీస్ హజారీ కోర్టులో ఒక విచిత్ర ఘటన చోటుచేసుకుంది. హత్య కేసులో నిందితుడిగా ఉన్న సర్జన్ అయిన ఒక డాక్టర్, విచారణ జరుగుతుండగా కోర్టు హాలు నేలపై బియ్యం చల్లడం తీవ్ర కలకలం రేపింది. అది చేతబడిలో భాగమని న్యాయవాదులు అనుమానించడంతో సుమారు 20 నిమిషాల పాటు విచారణ నిలిచిపోయింది. ఈ చర్యపై తీవ్ర ఆగ్రహం వ్యక్తం చేసిన న్యాయమూర్తి, సదరు డాక్టర్ కు రూ. 2,000 జరిమానా విధించారు.
పూర్తి వివరాల్లోకి వెళితే.. 2011 నాటి హత్య కేసులో డాక్టర్ చందర్ విభాస్ నిందితుడిగా ఉన్నారు. ఈ కేసుకు సంబంధించి ఆగస్టు 11న అదనపు సెషన్స్ జడ్జి షెఫాలీ బర్నాలా టాండన్ ముందు విచారణ జరుగుతున్న సమయంలో ఆయన ఉన్నట్టుండి నేలపై గుప్పెడు బియ్యం చల్లారు. దీంతో అక్కడున్న న్యాయవాదులు భయాందోళనలకు గురయ్యారు. అది చేతబడి అని అనుమానించి, జడ్జి బల్ల వద్దకు వెళ్లేందుకు నిరాకరించారు. దీంతో విచారణకు అంతరాయం కలిగింది.
వెంటనే స్పందించిన జడ్జి, ఎందుకు ఇలా చేశారని డాక్టర్ ను ప్రశ్నించారు. తాను తింటున్నప్పుడు చేతిలోంచి బియ్యం గింజలు కింద పడిపోయాయని ఆయన చెప్పినప్పటికీ, అసలు కోర్టుకు బియ్యం ఎందుకు తెచ్చారన్నది చెప్పలేకపోయారు. దీంతో జడ్జి తీవ్ర అసహనం వ్యక్తం చేశారు. నిందితుడి ప్రవర్తన కోర్టు కార్యకలాపాలకు ఉద్దేశపూర్వకంగా అంతరాయం కలిగించేలా ఉందని, న్యాయస్థానం గౌరవాన్ని కించపరిచేలా ఉందని ఆయన వ్యాఖ్యానించారు.
అనంతరం కోర్టు సిబ్బందిని పిలిచి, నేలపై పడిన బియ్యాన్ని తీయించారు. ఈ ప్రక్రియకు సుమారు 15 నుంచి 20 నిమిషాల సమయం పట్టింది. భారతీయ న్యాయ సంహిత, 2023లోని సెక్షన్ 267 ప్రకారం ఇది నేరమని పేర్కొంటూ సదరు డాక్టర్ పై కేసు నమోదు చేశారు. ఒక డాక్టర్ అయివుండి, ఇలా బాధ్యతారహితంగా ప్రవర్తించడం ఆశ్చర్యానికి గురిచేసిందని జడ్జి అన్నారు.
కాగా, ఆగస్టు 2న జరిగిన విచారణలోనూ నేలపై ఇలాగే బియ్యం పడి ఉన్నాయని కోర్టు సిబ్బంది తెలిపారు. అయితే ఆ రోజు తాను వీడియో కాన్ఫరెన్స్ ద్వారానే హాజరయ్యానని డాక్టర్ చెప్పగా, ఆయన భౌతికంగానే హాజరయ్యారని కోర్టు రికార్డులు స్పష్టం చేశాయి. చివరకు తన తప్పును అంగీకరించిన డాక్టర్, క్షమాపణ కోరారు. ఆయనను ఎవరో తప్పుదోవ పట్టించారని ఆయన తరఫు న్యాయవాది కోర్టుకు తెలిపారు. భవిష్యత్తులో ఇలాంటివి పునరావృతం కావని హామీ ఇవ్వడంతో కోర్టు ఆయనకు రూ. 2,000 జరిమానా విధించింది.
