- వినూత్న ప్రతిపాదనను పరిశీలిస్తున్న జపనీస్ పట్టణం
- ఇది నిబంధన మాత్రమేనని, తప్పనిసరి కాదన్న టోయోకె మేయర్
- స్క్రీన్ సమయాన్ని తగ్గించడమే లక్ష్యమని స్పష్టీకరణ
- ఆచరణ సాధ్యం కాదంటున్న ప్రజలు
జపాన్లోని ఓ పట్టణం ఒక వినూత్న ప్రతిపాదనను పరిశీలిస్తోంది. పట్టణంలోని పౌరులు అందరూ రోజుకు గరిష్ఠంగా రెండు గంటల పాటు మాత్రమే స్మార్ట్ఫోన్లు ఉపయోగించాలని, ఈ మేరకు ఒక నిబంధనను తీసుకురావాలని యోచిస్తోంది. అయితే, ఇది ఎలాంటి చట్టబద్ధమైన కఠినమైన నియమం కాదు, కేవలం ఒక సలహా మాత్రమే.
ఈ ప్రతిపాదన ప్రకారం 6 నుంచి 12 సంవత్సరాల పిల్లలు రాత్రి 9 గంటల తర్వాత స్క్రీన్లకు దూరంగా ఉండాలి. అలాగే యువత, పెద్దలు రాత్రి 10 గంటల కల్లా తమ డివైజ్లను స్విచ్ ఆఫ్ చేయాలి. ఈ మేరకు, మున్సిపల్ అసెంబ్లీ ఆగస్టు 25న ఒక బిల్లును సమర్పించింది. ఈ నిబంధనలు తీసుకొచ్చి, అందరూ స్మార్ట్ఫోన్ వాడకాన్ని తగ్గించుకునేలా ప్రోత్సహించాలని ఈ బిల్లు లక్ష్యంగా పెట్టుకుంది.
ఎందుకీ నిర్ణయం?
ఈ ప్రతిపాదన ముఖ్యంగా అధిక స్క్రీన్ సమయాన్ని తగ్గించి, దాని వల్ల శారీరక, మానసిక ఆరోగ్యంపై పడే దుష్ప్రభావాలను నివారించడం లక్ష్యంగా పెట్టుకుంది. అంతేకాకుండా, నిద్ర నాణ్యతను మెరుగుపరచడం, అతిగా స్మార్ట్ఫోన్ వాడకం వల్ల కలిగే ప్రవర్తనా సమస్యలను తగ్గించడం దీని ముఖ్య ఉద్దేశం.
ఈ ప్రతిపాదన గురించి టోయోకె మేయర్ మసాఫుమి కోకి మాట్లాడుతూ “దీనర్థం నగరం తమ పౌరుల హక్కులను పరిమితం చేస్తోందని కాదు” అని చెప్పారు. “ఇది కేవలం ప్రతి కుటుంబం తమ స్మార్ట్ఫోన్ వాడకం గురించి, అలాగే ఏ సమయంలో ఫోన్లు వాడాలనే దాని గురించి ఆలోచించుకోవడానికి, చర్చించుకోవడానికి ఒక అవకాశం మాత్రమేనని నేను ఆశిస్తున్నాను” అని ఆయన అన్నారు.
ప్రజల నుంచి విమర్శలు
అయితే, ఈ ప్రతిపాదనకు ప్రజల నుంచి విమర్శలు ఎదురయ్యాయి. చాలామంది ఈ రెండు గంటల పరిమితిని ఆచరణ సాధ్యం కానిదిగా అభిప్రాయపడ్డారు. ఒక పౌరుడు, “పౌరుల స్వేచ్ఛను తగ్గించే హక్కు నగరానికి ఉందా?” అని ప్రశ్నించగా, మరొకరు “దీన్ని ఒక నిబంధనగా మార్చడం అవసరమా?” అని ప్రశ్నించాడు. ఈ బిల్లు కమిటీ సమీక్షలో ఉంది. సెప్టెంబర్ 22న దీనిపై ఓటు వేయనున్నారు.
