- 18 నెలల పాలనపై సీఎం చంద్రబాబును టార్గెట్ చేసిన జగన్
- ఎన్నికల హామీలు ఏ ఒక్కటీ నెరవేర్చలేదని తీవ్ర విమర్శ
- వెలుగుతున్న దీపాలను కూడా ఈ ప్రభుత్వం ఆర్పివేసిందని ఆరోపణ
- తమ ప్రభుత్వ సంక్షేమ పథకాలను నిలిపివేశారని ధ్వజం
- పిన్నపురం ప్రాజెక్టుపై లోకేష్ను విమర్శించిన గుడివాడ అమర్నాథ్
- జగన్ ఘనతను లోకేష్ దక్కించుకోవాలని చూస్తున్నారని వ్యాఖ్య
ఆంధ్రప్రదేశ్లో కూటమి ప్రభుత్వం ఏర్పడి 18 నెలలు గడిచినా, ఎన్నికలకు ముందు ఇచ్చిన హామీలను నెరవేర్చడంలో ముఖ్యమంత్రి చంద్రబాబు విఫలమయ్యారని వైసీపీ అధినేత జగన్ తీవ్రస్థాయిలో విమర్శించారు. ఈ ప్రభుత్వ పాలనలో ఒక్క దీపమైనా వెలిగించారా అని ఆయన సూటిగా ప్రశ్నించారు. ఈ మేరకు సోమవారం ఆయన ‘ఎక్స్’ వేదికగా ప్రభుత్వంపై ధ్వజమెత్తారు.
ఎన్నికల సమయంలో తెలుగుదేశం పార్టీ ఇచ్చిన హామీలను జగన్ గుర్తుచేశారు. నిరుద్యోగ యువతకు నెలకు రూ.3,000 భృతి, ప్రతి మహిళకు రూ.1,500, 50 ఏళ్లకే రూ.4,000 పింఛను, పీఎం-కిసాన్తో పాటు రైతులకు ఏటా రూ.20,000 ఆర్థిక సాయం, ప్రతి బిడ్డకు రూ.15,000, ఏడాదికి మూడు గ్యాస్ సిలిండర్లు, మహిళలకు ఉచిత బస్సు ప్రయాణం వంటి హామీలు ఏమయ్యాయని నిలదీశారు. వీటిలో ఏ ఒక్కటీ ఇంతవరకు వాస్తవరూపం దాల్చలేదని ఆయన ఆరోపించారు.
కొత్త దీపాలు వెలిగించడం అటుంచి, 2019 నుంచి 2024 వరకు తమ హయాంలో వెలుగులు నింపిన పథకాల దీపాలను కూడా చంద్రబాబు ప్రభుత్వం ఆర్పివేసిందని జగన్ మండిపడ్డారు. తమ పాలనలో దాదాపు 30 సంక్షేమ పథకాల ద్వారా ప్రతి ఇంటికీ నేరుగా లబ్ధి చేకూర్చామని, కానీ ప్రస్తుత ప్రభుత్వం రాష్ట్రంలో చీకట్లు, నిరాశను నింపిందని విమర్శించారు. పాఠశాలలు, ఆసుపత్రులు, వ్యవసాయం, సంక్షేమం, శాంతిభద్రతలు వంటి అన్ని రంగాలు ప్రస్తుత పాలనలో దెబ్బతిన్నాయని ఆయన ఆవేదన వ్యక్తం చేశారు.
పిన్నపురం ప్రాజెక్టుపై లోకేశ్ ను విమర్శించిన అమర్నాథ్
ఇదిలా ఉండగా, వైసీపీ నేత, మాజీ మంత్రి గుడివాడ అమర్నాథ్, రాష్ట్ర ఐటీ మంత్రి నారా లోకేశ్ పై విమర్శలు గుప్పించారు. తమ అధినేత జగన్ ముందుచూపుతో రూపుదిద్దుకున్న 4.2 బిలియన్ డాలర్ల పిన్నపురం సోలార్, విండ్, పంప్డ్ స్టోరేజ్ ప్రాజెక్టు విజయాన్ని ఎట్టకేలకు లోకేశ్ ఒప్పుకున్నారని ఆయన తెలిపారు. “ఒకప్పుడు రాజకీయ లబ్ధి కోసం ఇదే ప్రాజెక్టుపై వ్యంగ్యాస్త్రాలు సంధించిన లోకేశ్, ఇప్పుడు సిగ్గులేకుండా ఆ ఘనతను తమ ఖాతాలో వేసుకోవాలని చూడటం హాస్యాస్పదం. ఆయన ద్వంద్వ వైఖరి, ఉనికి కోసం పడుతున్న తాపత్రయానికి ఇది నిదర్శనం” అని అమర్నాథ్ అన్నారు. జగన్ దార్శనికత వల్లే పిన్నపురం ప్రాజెక్టు సాకారమైందని, కేవలం ట్వీట్లు వేస్తే కాదని ఆయన స్పష్టం చేశారు.
