బులియన్ మార్కెట్లో ధరల పెరుగుదల కొనసాగుతోంది. అంతర్జాతీయ పరిణామాల నేపథ్యంలో గురువారం పసిడి, వెండి ధరలు మరోసారి భారీగా పుంజుకున్నాయి. ప్రపంచ మార్కెట్లో ఇన్వెస్టర్లు సురక్షిత పెట్టుబడి సాధనంగా భావించే బంగారం వైపు మొగ్గు చూపడంతో డిమాండ్ ఒక్కసారిగా పెరిగింది. ఫలితంగా అంతర్జాతీయంగా ఔన్సు బంగారం ధర 4900 డాలర్ల మైలురాయిని దాటగా, వెండి కూడా 96 డాలర్ల వద్ద ట్రేడ్ అవుతోంది.
ఈ ప్రభావం నేరుగా స్థానిక మార్కెట్లపై పడింది. హైదరాబాద్ బులియన్ మార్కెట్లో గురువారం అర్థరాత్రి సమయానికి 10 గ్రాముల మేలిమి (24 క్యారెట్ల) బంగారం ధర రూ. 1,59,000కు చేరుకుంది. వెండి కూడా అదే బాటలో పయనిస్తూ కిలో ధర రూ. 3,26,000 వద్ద స్థిరపడింది. భౌగోళిక రాజకీయ ఉద్రిక్తతలు, డాలర్ విలువలో మార్పుల కారణంగా రానున్న రోజుల్లో ధరలు మరింత పెరిగే అవకాశం ఉందని మార్కెట్ నిపుణులు విశ్లేషిస్తున్నారు.
పసిడి ధరల జోరు.. ఎన్బీఎఫ్సీల రుణాలకు పెరుగుతున్న డిమాండ్
- 2027 మార్చి నాటికి రూ.4 లక్షల కోట్లకు చేరనున్న ఎన్బీఎఫ్సీల గోల్డ్ లోన్లు
- రాబోయే రెండేళ్లలో 40 శాతం మేర వార్షిక వృద్ధి నమోదు అంచనా
- భారీగా పెరిగిన బంగారం ధరలే వృద్ధికి ప్రధాన కారణం
- సెక్యూర్డ్ రుణాల వైపు మొగ్గు చూపుతున్న ప్రజలు
- క్రిసిల్ రేటింగ్స్ నివేదికలో వెల్లడి
దేశంలో బంగారంపై రుణాలు అందించే బ్యాంకింగేతర ఆర్థిక సంస్థల (ఎన్బీఎఫ్సీ) వ్యాపారం రాబోయే రెండేళ్లలో పరుగులు పెట్టనుంది. 2027 మార్చి నాటికి ఈ సంస్థల నిర్వహణలోని ఆస్తులు (ఏయూఎం) రూ.4 లక్షల కోట్లను అధిగమిస్తాయని ప్రముఖ రేటింగ్ ఏజెన్సీ క్రిసిల్ రేటింగ్స్ అంచనా వేసింది. గత రెండేళ్లలో 27 శాతంగా ఉన్న వృద్ధి రేటు, రాబోయే రెండేళ్లలో ఏకంగా 40 శాతానికి చేరుతుందని తన నివేదికలో వెల్లడించింది.
ఈ భారీ వృద్ధికి పలు కారణాలను క్రిసిల్ విశ్లేషించింది. ముఖ్యంగా, బంగారం ధరలు గణనీయంగా పెరగడం ప్రధాన కారణంగా నిలుస్తోంది. ప్రస్తుత ఆర్థిక సంవత్సరం మొదటి తొమ్మిది నెలల్లోనే పసిడి ధరలు సుమారు 68 శాతం పెరిగాయి. దీంతో, అధిక విలువ కలిగిన హామీపై ఎక్కువ రుణాలు ఇచ్చేందుకు సంస్థలకు వీలు కలుగుతోంది. అదే సమయంలో, అన్సెక్యూర్డ్ రుణాలపై నిబంధనలు కఠినతరం కావడంతో ప్రజలు ఎక్కువగా సురక్షితమైన గోల్డ్ లోన్ల వైపు మొగ్గు చూపుతున్నారు.
ఈ అవకాశాలను అందిపుచ్చుకునేందుకు ఎన్బీఎఫ్సీలు వినూత్న వ్యూహాలను అనుసరిస్తున్నాయి. “పెద్ద ఎన్బీఎఫ్సీలు తమ బ్రాండ్ ఇమేజ్తో ప్రస్తుత శాఖల్లోనే వ్యాపారాన్ని విస్తరిస్తున్నాయి. మరోవైపు, మధ్య తరహా సంస్థలు కొత్త బ్రాంచ్లను ఏర్పాటు చేయడంతో పాటు, పెద్ద సంస్థలకు, బ్యాంకులకు ఒరిజినేటింగ్ పార్టనర్లుగానూ వ్యవహరిస్తున్నాయి” అని క్రిసిల్ రేటింగ్స్ డైరెక్టర్ అపర్ణా కిరుబాకరన్ వివరించారు.
ఈ క్రమంలోనే, ఒక్కో బ్రాంచ్కు సగటు ఏయూఎం 2024 ఆర్థిక సంవత్సరంలో రూ.10 కోట్లు ఉండగా, ఈ ఏడాది ప్రథమార్ధంలో రూ.14 కోట్లకు పెరిగింది. దీనికి తోడు, 2026 ఏప్రిల్ 1 నుంచి చిన్న మొత్తాల గోల్డ్ లోన్లకు సరళీకరించిన లోన్-టు-వాల్యూ (LTV) నిబంధనలు అమల్లోకి రానుండటం కూడా ఈ రంగానికి మరింత ఊతమివ్వనుంది.
