- విజయ్, త్రిష మధ్య ఏదో ఉందంటూ జోరుగా ప్రచారం
- వివాహ రిసెప్షన్ కు ఒకే కారులో వచ్చిన విజయ్, త్రిష
- రిసెప్షన్ లో పక్కపక్కనే కూర్చుని సందడి చేసిన జంట
- తన భర్తకు ఒక నటితో సంబంధం ఉందని ఇటీవల వ్యాఖ్యానించిన విజయ్ భార్య
- తమిళనాడు ఎన్నికల సమయంలో వార్తల్లో విజయ్
తమిళ సినీ పరిశ్రమలో దశాబ్దాలుగా వెలుగొందుతున్న నటుడు, టీవీకే (TVK) పార్టీ అధినేత విజయ్, ప్రముఖ నటి త్రిషల మధ్య ఉన్న ఏదో ఉందంటూ వస్తున్న పుకార్లు ఇప్పుడు మరోసారి కోలీవుడ్లో హాట్ టాపిక్గా మారాయి. తన భర్తకు ఒక నటితో సంబంధం ఉందంటూ విజయ్ భార్య సంగీత ఇటీవల సంచలన ఆరోపణలు చేసిన సంగతి తెలిసిందే. ఇలాంటి తరుణంలో, చెన్నైలో జరిగిన ఒక వివాహ రిసెప్షన్కు విజయ్-త్రిష జంట ఒకే కారులో కలిసి రావడం అందరినీ ఆశ్చర్యపరిచింది. ఇందుకు సంబంధించిన ఫొటోలు, వీడియోలు ప్రస్తుతం సోషల్ మీడియాలో విపరీతంగా వైరల్ అవుతున్నాయి.
ప్రముఖ నిర్మాత కల్పతి ఎస్. సురేశ్ కుమారుడి వివాహ వేడుకకు తమిళ చిత్ర పరిశ్రమకు చెందిన దిగ్గజాలంతా హాజరయ్యారు. అయితే, అందరి కళ్లు మాత్రం విజయ్, త్రిషలపైనే నిలిచాయి. వారిద్దరూ కలిసి ఒకే కారులో రావడం, వేడుకలో పక్కపక్కనే కూర్చుని సందడి చేయడం చూసిన వారంతా వారి మధ్య ఉన్నది కేవలం స్నేహం మాత్రమేనా? లేక అంతకు మించి ఏమైనా ఉందా? అనే చర్చలు మొదలుపెట్టారు. గతంలో వీరిద్దరూ ‘ఘిల్లి’, ‘తిరుపాచి’, ‘కురువి’, ‘లియో’ వంటి చిత్రాల్లో కలిసి నటించారు. అప్పటి నుంచే వీరిద్దరి మధ్య ఏదో ఉందనే ఊహాగానాలు ఉన్నప్పటికీ, ఎప్పుడూ ఇలా బహిరంగంగా ఒకే కారులో కనిపించిన దాఖలాలు లేవు.
విజయ్ వ్యక్తిగత జీవితం చుట్టూ వివాదాలు నడుస్తున్న తరుణంలో ఈ ఘటన చోటుచేసుకోవడం గమనార్హం. గత డిసెంబర్లోనే విజయ్ భార్య సంగీత విడాకుల కోసం పిటిషన్ దాఖలు చేసినట్లు వెల్లడిస్తూ, తన భర్తకు ఒక నటితో అనుబంధం ఉందని చేసిన వ్యాఖ్యలు అప్పట్లో పెద్ద తుపానును సృష్టించాయి. ప్రస్తుతం ఈ విడాకుల కేసు చెంగల్పట్టు కుటుంబ న్యాయస్థానంలో కొనసాగుతోంది. అటు రాజకీయంగా చూస్తే, రాబోయే తమిళనాడు అసెంబ్లీ ఎన్నికల కోసం విజయ్ తన శక్తియుక్తులను ధారపోస్తున్నారు. ఈ క్రమంలో ఇలాంటి వ్యక్తిగత విమర్శలు ఆయన రాజకీయ ప్రస్థానంపై ఎలాంటి ప్రభావం చూపుతాయోనని అభిమానులు, రాజకీయ విశ్లేషకులు ఆసక్తిగా గమనిస్తున్నారు.
