- కాల్పుల విరమణ ఒప్పందానికి తుది గడువేమీ లేదన్న భారత సైన్యం
- మే 12 నాటి ఒప్పందం యథాతథంగా కొనసాగింపు
- కొన్ని మీడియా కథనాలపై భారత సైన్యం స్పష్టత
భారత, పాకిస్థాన్ దేశాల డైరెక్టర్ జనరల్ ఆఫ్ మిలిటరీ ఆపరేషన్స్ (డీజీఎంవో)ల మధ్య ప్రస్తుతం ఎలాంటి చర్చలు ఖరారు కాలేదని భారత సైన్యం ఆదివారం స్పష్టం చేసింది. సరిహద్దుల్లో ఘర్షణలు నిలిపివేయాలని మే 12న ఇరుదేశాల డీజీఎంవోల మధ్య జరిగిన చర్చల్లో తీసుకున్న నిర్ణయానికి ఎలాంటి ఎక్స్ పైరీ డేట్ (తుది గడువు) లేదని కూడా సైన్యం తేల్చి చెప్పింది. ఆ ఒప్పందం యథాతథంగా కొనసాగుతుందని స్పష్టం చేసింది. ఇరు దేశాల మధ్య కాల్పుల విరమణ ఒప్పందం మే 18తో ముగిసిపోనుందంటూ కొన్ని మీడియా మాధ్యమాల్లో వచ్చిన కథనాల నేపథ్యంలో ఈ వివరణ ప్రాధాన్యత సంతరించుకుంది.
“ఈరోజు డీజీఎంవోల మధ్య ఎలాంటి చర్చలు జరగడం లేదు. మే 12న డీజీఎంవోల మధ్య జరిగిన చర్చల్లో అంగీకరించిన విధంగా ఘర్షణల నిలిపివేత కొనసాగింపునకు సంబంధించి ఎలాంటి గడువు తేదీ లేదు” అని భారత ఆర్మీకి చెందిన ఒక అధికారి వెల్లడించారు.
మే 12న జరిగిన చర్చల్లో, ఇరు పక్షాలు కాల్పులు జరపకూడదని, ఎలాంటి దూకుడు చర్యలకు పాల్పడకూడదనే నిబద్ధతను కొనసాగించాలని అంగీకరించాయి. సరిహద్దులు, ఫార్వర్డ్ ఏరియాల్లో బలగాలను తక్షణమే తగ్గించుకోవడానికి కూడా రెండు దేశాలు సమ్మతించాయి.
మే 10న పాకిస్థాన్ డీజీఎంవో, భారత డీజీఎంవో లెఫ్టినెంట్ జనరల్ రాజీవ్ ఘాయ్కు ఫోన్ చేసి, ఘర్షణలు నిలిపివేయాలని సూచించిన తర్వాతే ఈ కాల్పుల విరమణ, సైనిక చర్యల నిలిపివేత ఒప్పందం కుదిరింది. ఈ విషయాన్ని లెఫ్టినెంట్ జనరల్ రాజీవ్ ఘాయ్ మే 11న జరిగిన ఒక సంయుక్త మీడియా సమావేశంలో ప్రస్తావించారు. తమ మధ్య జరిగిన సంభాషణలో పాకిస్థాన్ ఆర్మీ అధికారి “మనం ఘర్షణలు ఆపేద్దాం” అని ప్రతిపాదించినట్లు ఆయన తెలిపారు.
గత నెలలో జమ్మూకశ్మీర్లోని పహల్గామ్లో జరిగిన ఉగ్రదాడిలో 26 మంది ప్రాణాలు కోల్పోయిన ఘటనకు ప్రతిస్పందనగా, భారత్ మే 7న ‘ఆపరేషన్ సిందూర్’ చేపట్టింది. ఈ ఆపరేషన్లో భాగంగా పాకిస్థాన్ మరియు పాక్ ఆక్రమిత కశ్మీర్లోని తొమ్మిది ఉగ్రవాద సంబంధిత స్థావరాలను లక్ష్యంగా చేసుకుంది. ఈ పరిణామాల నేపథ్యంలోనే డీజీఎంవోల మధ్య చర్చలు, కాల్పుల విరమణ ఒప్పందం జరిగాయి.
