- కోనసీమ జిల్లా అంతర్వేదిలో సముద్రం వెనక్కి!
- ఏకంగా 500 మీటర్ల మేర అంతర్ముఖం
- మోకాళ్ల లోతులో పేరుకుపోయిన ఒండ్రు మట్టి
- గతంలో ఇసుక మేటలు, ఇప్పుడు ఒండ్రు మట్టి మేట వేసిన వైనం
- సునామీ భయంతో ఆందోళన చెందుతున్న స్థానికులు
కోనసీమ జిల్లా అంతర్వేది వద్ద బంగాళాఖాతం అనూహ్యంగా వెనక్కి తగ్గింది. ఏకంగా 500 మీటర్ల (అర కిలోమీటర్) మేర సముద్రం వెనక్కి వెళ్లడం తీవ్ర కలకలం రేపింది. సముద్రం వెనక్కి వెళ్లిన ప్రాంతమంతా ఇప్పుడు మోకాళ్ల లోతులో చిక్కటి ఒండ్రు మట్టితో నిండిపోయింది.
ఈ అనూహ్య పరిణామంతో అంతర్వేది సహా చుట్టుపక్కల గ్రామాల ప్రజలు తీవ్ర భయాందోళనలకు గురవుతున్నారు. గతంలో సునామీ వంటి ప్రకృతి విపత్తులు సంభవించే ముందు ఇలాగే సముద్రం వెనక్కి వెళుతుందని పెద్దలు చెప్పిన మాటలను గుర్తుచేసుకుంటూ ఆందోళన చెందుతున్నారు. సాధారణంగా ఇసుక మేటలు వేసే సముద్ర తీరం, ఇలా ఒండ్రుతో కనిపించడం వారిలో భయాన్ని మరింత పెంచుతోంది.
గతంలోనూ అంతర్వేది వద్ద సముద్రం కొన్ని మీటర్ల మేర వెనక్కి వెళ్లిన సందర్భాలు ఉన్నాయని, అప్పుడు ఇసుక మేటలు ఏర్పడ్డాయని స్థానికులు చెబుతున్నారు. కానీ, ఈసారి ఏకంగా అర కిలోమీటర్ దూరం వెనక్కి తగ్గడంతో పాటు, ఒండ్రు మట్టి పేరుకుపోవడం మునుపెన్నడూ చూడలేదని వారు అంటున్నారు. ఈ వింత పరిణామం వెనుక కారణాలు తెలియక స్థానిక మత్స్యకారులు, గ్రామస్తులు ఆందోళనతో అధికారుల స్పందన కోసం ఎదురుచూస్తున్నారు.
