- పార్టీ చీలిపోతుందని కలలో కూడా అనుకోలేదన్న శరద్ పవార్
- కొంతమంది సిద్ధాంతాల వల్లే ఎన్సీపీలో చీలిక వచ్చిందని వ్యాఖ్య
- సవాళ్లను ఎదుర్కొన్న కార్యకర్తలకు పవార్ అభినందనలు
- స్థానిక సంస్థల ఎన్నికలకు సిద్ధం కావాలని పార్టీ శ్రేణులకు పిలుపు
- మహిళలకు 50 శాతం రిజర్వేషన్లపై దృష్టి సారించాలని సూచన
- అధికారం కోసం కాకుండా, ప్రజాసేవకే ప్రాధాన్యమన్న పవార్
నేషనలిస్ట్ కాంగ్రెస్ పార్టీ (ఎన్సీపీ) రెండుగా చీలిన పరిణామం తనను తీవ్రంగా కలచివేసిందని, పార్టీ ఇలా ముక్కలవుతుందని కలలో కూడా ఊహించలేదని ఎన్సీపీ (శరద్ పవార్) వర్గం అధ్యక్షుడు శరద్ పవార్ ఆవేదన వ్యక్తం చేశారు. పార్టీ ఆవిర్భావ దినోత్సవం సందర్భంగా పుణెలో జరిగిన కార్యక్రమంలో ఆయన ప్రసంగించారు. పార్టీ చీలిపోయినప్పటికీ, మొక్కవోని దీక్షతో సవాళ్లను ఎదుర్కొంటూ పార్టీ కార్యక్రమాలను ముందుకు తీసుకెళుతున్న నాయకులు, కార్యకర్తలను ఆయన ఈ సందర్భంగా అభినందించారు. పార్టీ ఆరంభం నుంచి ఎన్నో ఒడిదొడుకులను, సవాళ్లను ఎదుర్కొందని శరద్ పవార్ గుర్తుచేశారు. అయినప్పటికీ, నిరుత్సాహపడకుండా పార్టీని నిలబెట్టుకున్నామని తెలిపారు. “కొద్ది మంది వ్యక్తుల విభిన్న భావజాలాల కారణంగా పార్టీ విడిపోయింది. దీని గురించి ఎక్కువగా మాట్లాడాలనుకోవడం లేదు. పార్టీ సిద్ధాంతాలపై విశ్వాసం ఉన్నవారే పార్టీలో కొనసాగుతారు” అని శరద్ పవార్ పేర్కొన్నారు.
రాబోయే ఎన్నికల్లో సరికొత్త రాజకీయ పరిణామాలు చోటుచేసుకుంటాయని ఆయన జోస్యం చెప్పారు. పార్టీలోకి ఎవరు వస్తున్నారు, ఎవరు వెళ్లిపోతున్నారు అనే విషయాలను పట్టించుకోవద్దని, అందరూ కలిసికట్టుగా ప్రజలను ఏకం చేయగలిగితే ఎలాంటి సమస్యలూ దరిచేరవని పార్టీ శ్రేణులకు హితవు పలికారు. “చాలా మంది నాయకులు ప్రజలకు సేవ చేయాలనే దృఢ సంకల్పంతో ఉన్నారు. వారే పార్టీకి అసలైన బలం, బలగం. అధికారం గురించి ఆలోచించవద్దు. మనమంతా ఐక్యంగా ఉంటే, అధికారమే మనల్ని అనుసరిస్తుంది” అని పవార్ ఉద్బోధించారు. మరో రెండు, మూడు నెలల్లో స్థానిక సంస్థల ఎన్నికలు జరగనున్నాయని, పార్టీ నాయకులంతా క్రియాశీలకంగా పాల్గొని మెరుగైన ఫలితాలు సాధించేందుకు కృషి చేయాలని శరద్ పవార్ పిలుపునిచ్చారు. ఎన్సీపీ (ఎస్పీ) కొత్త తరం నాయకులను తయారు చేసేందుకు కృషి చేస్తోందని ఆయన తెలిపారు. స్థానిక సంస్థల ఎన్నికల్లో మహిళలకు 50 శాతం రిజర్వేషన్లు అమలవుతున్నాయని, ఏయే ప్రాంతాల్లో మహిళా అభ్యర్థులను నిలబెడితే ప్రయోజనకరంగా ఉంటుందో అంచనా వేసి ప్రణాళికలు రచించాలని సూచించారు.
