- టిబెట్ విషయంలో భారత్కు చైనా గట్టి హెచ్చరిక
- అంతర్గత వ్యవహారాల్లో జోక్యం చేసుకోవద్దని స్పష్టీకరణ
- దలైలామా వారసుడిపై భారత మంత్రి కీలక వ్యాఖ్యలతో వివాదం
- ఉత్తరాధికారిని నిర్ణయించేది దలైలామా ట్రస్టేనన్న భారత్
- వారసుడిని ఆమోదించే హక్కు తమదేనంటున్న చైనా
- ద్వైపాక్షిక సంబంధాలపై ప్రభావం చూపవద్దని సూచన
టిబెట్ ఆధ్యాత్మిక గురువు దలైలామా విషయంలో భారత్, చైనాల మధ్య మరోమారు మాటల యుద్ధం మొదలైంది. టిబెట్ అంశాన్ని ఉపయోగించి తమ అంతర్గత వ్యవహారాల్లో జోక్యం చేసుకోవద్దని, ద్వైపాక్షిక సంబంధాలను దెబ్బతీయవద్దని చైనా శుక్రవారం భారత్ను హెచ్చరించింది. ఈ మేరకు చైనా విదేశాంగ శాఖ ఒక ప్రకటన విడుదల చేసింది. భారత సీనియర్ మంత్రి కిరణ్ రిజిజు గురువారం చేసిన వ్యాఖ్యల నేపథ్యంలో చైనా ఈ విధంగా స్పందించింది. టిబెటన్ బౌద్ధమతానికి తదుపరి ఆధ్యాత్మిక వారసుడిని గుర్తించే అధికారం కేవలం దలైలామాకు, ఆయన ఏర్పాటు చేసిన ట్రస్టుకు మాత్రమే ఉందని కేంద్ర మంత్రి కిరణ్ రిజిజు స్పష్టం చేశారు. ఈ వ్యాఖ్యలు, దలైలామా ఉత్తరాధికారిని ఆమోదించే హక్కు తమకే ఉందన్న చైనా దీర్ఘకాల వాదనకు పూర్తిగా విరుద్ధంగా ఉన్నాయి. సామ్రాజ్యవాద కాలం నుంచి వస్తున్న వారసత్వం ప్రకారం, తదుపరి దలైలామాను ఆమోదించే హక్కు తమకే ఉందని బీజింగ్ చాలాకాలంగా వాదిస్తోంది. ఈ క్రమంలో, కేంద్రమంత్రి వ్యాఖ్యలపై చైనా ఆగ్రహం వ్యక్తం చేస్తోంది.
