- 93 ఏళ్ల వయసులోనూ తగ్గని స్ఫూర్తితో ‘మెట్రోమ్యాన్’ శ్రీధరన్
- కేరళ హైస్పీడ్ రైలు ప్రాజెక్టు కోసం కార్యాలయం ప్రారంభం
- బడ్జెట్లో ప్రస్తావన లేకపోయినా అనుమతిపై పూర్తి విశ్వాసం
- డీపీఆర్ సిద్ధం చేయాలని రైల్వే మంత్రి ఆదేశించారన్న శ్రీధరన్
- ప్రజల సందేహాల నివృత్తికి ఈ నెల 15 నుంచి ప్రత్యేక సమావేశాలు
భారత ‘మెట్రోమ్యాన్’గా పేరుగాంచిన ఇ.శ్రీధరన్, 93 ఏళ్ల వయసులోనూ తనలోని కార్యదీక్ష, పట్టుదల ఏమాత్రం తగ్గలేదని నిరూపించారు. కేరళలో ప్రతిపాదిత హైస్పీడ్ రైలు ప్రాజెక్టును వాస్తవరూపంలోకి తెచ్చేందుకు ఆయన నడుం బిగించారు. ఇందులో భాగంగా ఇవాళ మలప్పురం జిల్లాలోని పొన్నానిలో తన నివాసానికి సమీపంలో ప్రాజెక్టు అధికారిక కార్యాలయాన్ని ప్రారంభించారు. నిరాడంబరంగా జరిగిన ఈ కార్యక్రమంలో శ్రీధరన్ అర్ధాంగి జ్యోతి ప్రజ్వలన చేయడం విశేషం.
ఈ సందర్భంగా శ్రీధరన్ మాట్లాడుతూ… ఒక ప్రొఫెషనల్ మాస్టర్ బిల్డర్గా తన పనిని కొనసాగిస్తానని స్పష్టం చేశారు. కేంద్ర బడ్జెట్లో ఈ ప్రాజెక్టు గురించి ప్రస్తావన లేకపోవడం తన సంకల్పాన్ని ఏమాత్రం నీరుగార్చలేదని అన్నారు. రైల్వే మంత్రిత్వ శాఖ నుంచి అనుమతి లభిస్తుందన్న గట్టి నమ్మకం తనకు ఉందని, ఇలాంటి భారీ ప్రాజెక్టులకు పట్టుదల, స్పష్టమైన లక్ష్యం ఎంతో అవసరమని ఆయన పేర్కొన్నారు.
ప్రారంభ దశలో ఈ కార్యాలయం ప్రజలకు ప్రాజెక్టుపై ఉన్న సందేహాలను నివృత్తి చేసే కేంద్రంగా పనిచేస్తుంది. ఈ నెల 15 నుంచి ప్రాజెక్టుకు సంబంధించిన సాంకేతిక, ఆర్థిక, సామాజిక అంశాలను ప్రజలకు వివరించేందుకు సమావేశాలు నిర్వహించనున్నారు. తొలిదశ సమావేశాలు మలప్పురంలో ప్రారంభించి, ఆ తర్వాత ప్రాజెక్టు మార్గం వెళ్లే ఇతర జిల్లాల్లోనూ కొనసాగిస్తారు.
కేంద్ర రైల్వే మంత్రితో జనవరి 16న జరిపిన చర్చలు ఫలవంతమయ్యాయని శ్రీధరన్ తెలిపారు. డీటెయిల్డ్ ప్రాజెక్ట్ రిపోర్ట్ (DPR) సిద్ధం చేయాలని మంత్రి ఆదేశించారని, ఈ బాధ్యతను ఢిల్లీ మెట్రో రైల్ కార్పొరేషన్ (DMRC)కు అప్పగిస్తూ అధికారిక ఉత్తర్వులు మరో 3-4 రోజుల్లో వస్తాయని ఆయన ఆశాభావం వ్యక్తం చేశారు. తనకు వయసు అడ్డంకి కాదని, దేశానికి సేవ చేయడమే ముఖ్యమని ఆయన స్పష్టం చేశారు.
