- ఇరాన్ క్షిపణిని అడ్డుకోవడంతో కిందపడిన శకలాలతో ప్రమాదం
- రద్దీగా ఉండే అల్ బర్షా ప్రాంతంలో ఘటన
- ప్రాణనష్టంతో దుబాయ్లోని ప్రవాసుల్లో పెరిగిన భయాందోళనలు
- ప్రజలు అప్రమత్తంగా ఉండాలని యూఏఈ రక్షణ శాఖ హెచ్చరిక
ఇరాన్, ఇజ్రాయెల్ మధ్య కొనసాగుతున్న భీకర పోరు పరోక్షంగా అమాయకుల ప్రాణాలను బలితీసుకుంటోంది. తాజాగా దుబాయ్లో ఇరాన్ ప్రయోగించిన క్షిపణి శకలాలు కారుపై పడటంతో పాకిస్థాన్కు చెందిన ఓ డ్రైవర్ అక్కడికక్కడే మృతి చెందాడు. నగరంలోని అత్యంత రద్దీ ప్రాంతమైన అల్ బర్షాలో ఈ విషాద ఘటన చోటుచేసుకుంది.
ఇరాన్ నుంచి దూసుకొచ్చిన ఓ బాలిస్టిక్ క్షిపణిని యూఏఈ గగనతల రక్షణ వ్యవస్థలు విజయవంతంగా అడ్డుకున్నాయి. అయితే, ఆకాశంలోనే పేల్చివేసిన క్షిపణికి చెందిన ఓ భారీ శకలం నేరుగా రోడ్డుపై ప్రయాణిస్తున్న కారుపై పడింది. ఈ దుర్ఘటనలో కారు నడుపుతున్న పాకిస్థాన్ జాతీయుడు అక్కడికక్కడే ప్రాణాలు కోల్పోయినట్లు స్థానిక మీడియా వెల్లడించింది.
అంతకుముందు దుబాయ్ మెరీనాలోని భవనాలకు స్వల్ప నష్టం వాటిల్లగా, ఇప్పుడు ఏకంగా ప్రాణనష్టం సంభవించడంతో ప్రవాసుల్లో తీవ్ర భయాందోళనలు నెలకొన్నాయి. ఈ పరిణామంపై స్పందించిన యూఏఈ రక్షణ మంత్రిత్వ శాఖ, ప్రజలు అప్రమత్తంగా ఉండాలని, అధికారులు జారీ చేసే భద్రతా సూచనలను తప్పనిసరిగా పాటించాలని కోరింది. అమెరికా, ఇజ్రాయెల్ దాడులకు ప్రతిగా ఇరాన్ తన దాడులను కొనసాగిస్తుండటంతో యూఏఈ వంటి పొరుగు దేశాల భద్రతకు ముప్పు పొంచి ఉంది.
