- ఇండో-పసిఫిక్లో అధికార సమతుల్యతపై ఈ బంధాల ప్రభావంపై చర్చ
- సరిహద్దు వివాదాలు, వాణిజ్యం, టెక్నాలజీ వంటి అంశాలపై ప్రధానంగా దృష్టి
- ఫిబ్రవరి 17న వాషింగ్టన్లో ఈ కీలక సమావేశం నిర్వహణ
- అమెరికా ప్రయోజనాలపై భారత్-చైనా సంబంధాల ప్రభావాన్ని అంచనా వేయనున్న కమిషన్
అంతర్జాతీయ రాజకీయాల్లో భారత్ ప్రాధాన్యత రోజురోజుకు పెరుగుతోంది. ఈ నేపథ్యంలో అమెరికన్ కాంగ్రెస్కు చెందిన ఒక సలహా కమిటీ కీలక సమావేశాన్ని నిర్వహించనుంది. ఇండో-పసిఫిక్ ప్రాంతంలో అధికార సమతుల్యతను భారత్, చైనా, అమెరికా సంబంధాలు ఏ విధంగా ప్రభావితం చేస్తున్నాయనే అంశంపై ఈ బహిరంగ విచారణ జరగనుంది. ‘యూఎస్-చైనా ఎకనామిక్ అండ్ సెక్యూరిటీ రివ్యూ కమిషన్’ ఈ సమావేశాన్ని ఫిబ్రవరి 17న వాషింగ్టన్లో నిర్వహించనున్నట్లు అధికారికంగా ప్రకటించింది.
‘ఇండో-పసిఫిక్లో భారత్, చైనా, అధికార సమతుల్యత’ అనే అంశంపై ఈ సమావేశం జరగనుంది. ఇందులో భారత్-చైనా మధ్య వివాదాస్పద భూభాగంపై నెలకొన్న ఉద్రిక్తతలు, హిందూ మహాసముద్రంలో సముద్ర మార్గాలపై ఆధిపత్యం, ఇండో-పసిఫిక్లో కీలక శక్తిగా భారత్ పాత్ర వంటి సైనిక, భౌగోళిక రాజకీయ అంశాలను కమిషన్ పరిశీలించనుంది.
అంతేకాకుండా భారత్-చైనా మధ్య ఆర్థిక, సాంకేతిక సంబంధాలను కూడా ఈ సమావేశంలో సమీక్షించనున్నారు. ఇరు దేశాల మధ్య వాణిజ్య, పెట్టుబడి సంబంధాలతో పాటు ఆర్టిఫిషియల్ ఇంటెలిజెన్స్, సెమీకండక్టర్లు, ఫార్మా రంగాల్లో స్వయం సమృద్ధి సాధించేందుకు భారత్ చేస్తున్న ప్రయత్నాలపైనా దృష్టి సారించనున్నారు. ఈ సమావేశానికి కమిషనర్లు హాల్ బ్రాండ్స్, జోనాథన్ ఎన్. స్టివర్స్ అధ్యక్షత వహించనున్నారు.
భారత్తో వ్యూహాత్మక భాగస్వామ్యాన్ని బలోపేతం చేసేందుకు అమెరికా అనుసరిస్తున్న విధానాలను కూడా ఈ సమావేశంలో సమీక్షించనున్నారు. రాబోయే సంవత్సరాల్లో అమెరికా ఆర్థిక, జాతీయ భద్రతా ప్రయోజనాలకు చైనాతో భారత్ సంబంధాలు ఎంతవరకు కీలకం కానున్నాయో అంచనా వేయనున్నారు. ఇండో-పసిఫిక్లో కీలక వ్యూహాత్మక భాగస్వామిగా భారత్ ఎదుగుతున్న నేపథ్యంలో ఈ ప్రాంతంలో అధికార సమతుల్యతను ప్రభావితం చేసే శక్తిగా భారత్పై అమెరికా దృష్టి పెడుతోందని ఈ సమావేశం స్పష్టం చేస్తోంది.
