- ఇరాన్ చమురు కొనుగోళ్లలో 80 శాతం వాటా చైనాదే..
- ప్రతీకార దాడులు కొనసాగితే చైనా పారిశ్రామిక రంగానికి పెద్ద దెబ్బ
- హార్మూజ్ జల సంధి మూతపడితే చుక్కలను అంటనున్న చమురు ధరలు
ఇరాన్పై అమెరికా-ఇజ్రాయెల్ జరిపిన ‘ఆపరేషన్ ఎపిక్ ఫ్యూరీ’ దాడుల తర్వాత ప్రపంచమంతా అట్టుడుకుతుంటే, చైనా మాత్రం ఆశ్చర్యకరమైన రీతిలో మౌనం పాటిస్తోంది. కేవలం దాడులను ఖండిస్తూ, కాల్పుల విరమణకు పిలుపునివ్వడానికే పరిమితమైంది. చమురు సరఫరాకు ఆటంకం కలుగుతుందనే భయంతో చైనా వ్యూహాత్మక మౌనం పాటిస్తోందనే అభిప్రాయాలు వ్యక్తమవుతున్నాయి. చైనా తన భారీ పరిశ్రమలను నడపడానికి ఇరాన్ నుంచి రోజుకు సుమారు 13.8 లక్షల బ్యారెళ్ల ముడి చమురును దిగుమతి చేసుకుంటోంది. ఇరాన్ చమురు రవాణా మార్గాలకు ఆటంకం కలిగితే చైనా ఆర్థిక వ్యవస్థ ఒక్కసారిగా స్తంభించిపోతుంది.
హార్మూజ్ జలసంధి – చైనా ప్రాణనాడి..
చైనాకు వచ్చే చమురులో దాదాపు సగం ఈ జలసంధి గుండానే ప్రయాణించాలి. ఇరాన్ ప్రతీకార దాడుల వల్ల ఈ మార్గం మూతపడితే, అంతర్జాతీయ మార్కెట్లో చమురు ధరలు చుక్కలను తాకుతాయి. ఇది చైనాలోని తయారీ రంగానికి పెను శాపంగా మారుతుంది. అందుకే చైనా తన చమురు అవసరాల కోసం ప్రస్తుతం రష్యా మరియు సౌదీ అరేబియా వైపు మొగ్గు చూపుతూనే, ఇరాన్ నుంచి వస్తున్న సరఫరాను రక్షించుకోవడానికి తీవ్రంగా ప్రయత్నిస్తోంది.
ఇరాన్ ఒంటరి అవుతోందా..?
నిపుణుల విశ్లేషణ ప్రకారం.. ఇరాన్ చేస్తున్న ప్రతీకార దాడులు ఆ దేశానికే చేటు తెచ్చేలా ఉన్నాయి. గల్ఫ్ ప్రాంతంలోని అరబ్ దేశాల భూభాగంలో ఉన్న అమెరికా స్థావరాలను లక్ష్యంగా చేసుకోవడం ద్వారా, ఇరాన్ తన పొరుగు దేశాలను శత్రువులుగా మార్చుకుంటోంది. ఇది ఇరాన్ దౌత్య అవకాశాలను కుదిపేస్తోంది. వాస్తవానికి, చైనా కంటే ఇరాన్ కే చైనా అవసరం ఎక్కువగా ఉంది.
ఇరాన్ చమురు ఎగుమతుల్లో చైనా వాటా 80%..
ఇరాన్ చమురును భారీ ఎత్తున కొనే ఏకైక పెద్ద దేశం చైనానే కావడం గమనార్హం. ప్రస్తుతానికి చైనా ఆచి తూచి అడుగులు వేస్తోంది. ఒకవైపు ఇరాన్కు దౌత్యపరమైన అండగా కనిపిస్తూనే, మరోవైపు తన సొంత ఆర్థిక ప్రయోజనాలకు భంగం కలగకుండా రష్యా మరియు ఇతర గల్ఫ్ దేశాల నుండి చమురును పెంచుకుంటూ సమతుల్యతను పాటిస్తోంది.
