- శ్రీలంక తీరంలో మునిగిపోయిన ఇరాన్ నేవీ ఫ్రిగేట్ ‘ఐరిస్ డెనా’
- వెంటనే స్పందించి 30 మందిని రక్షించిన శ్రీలంక నావికాదళం
- జలాంతర్గామి దాడి వల్లే నౌక మునిగిందని అనుమానాలు
- 101 మంది సిబ్బంది ఆచూకీ గల్లంతైందన్న వార్తలపై గందరగోళం
శ్రీలంక సముద్ర జలాల్లో బుధవారం ఉదయం కీలక పరిణామం చోటుచేసుకుంది. ఇరాన్ కు చెందిన ‘ఐరిస్ డెనా’ (IRIS Dena) అనే యుద్ధనౌక (ఫ్రిగేట్) గాలే తీరానికి సమీపంలో మునిగిపోయింది. ఈ ప్రమాద సమయంలో శ్రీలంక నావికాదళం వేగంగా స్పందిించి సుమారు 30 మంది సిబ్బందిని ప్రాణాలతో రక్షించింది. ఈ విషయాన్ని శ్రీలంక విదేశాంగ మంత్రి విజిత హెరత్ పార్లమెంట్లో అధికారికంగా ప్రకటించారు.
బుధవారం తెల్లవారుజామున సుమారు 6 గంటల సమయంలో ఈ నౌక నుంచి ప్రమాద సంకేతాలు (Distress Call) అందాయని శ్రీలంక రక్షణ శాఖ తెలిపింది. వెంటనే అప్రమత్తమైన నావికాదళం రెండు నౌకలు, ఒక విమానాన్ని ఘటనా స్థలానికి పంపి సహాయక చర్యలు చేపట్టింది. రక్షించిన వారిలో గాయపడిన వారిని గాలేలోని నేషనల్ ఆసుపత్రికి తరలించారు. కాగా, రక్షించిన వారిలో ఒకరు మరణించగా, మరొకరి పరిస్థితి విషమంగా ఉన్నట్లు సమాచారం. ఈ నౌకలో మొత్తం 180 మంది సిబ్బంది ఉన్నట్లు తెలుస్తోంది.
అయితే, ప్రాణనష్టం విషయంలో భిన్న కథనాలు వినిపిస్తున్నాయి. సముద్ర గర్భం నుంచి జరిగిన దాడి (సబ్మెరైన్ అటాక్) వల్లే నౌక మునిగిపోయిందని, దాదాపు 101 మంది ఆచూకీ గల్లంతైందని రాయిటర్స్ వార్తా సంస్థ పేర్కొంది. కానీ, శ్రీలంక నావికాదళ ప్రతినిధి మాత్రం భారీ సంఖ్యలో సిబ్బంది గల్లంతయ్యారన్న వార్తలను ఖండించారు. ప్రస్తుతం 32 మందిని రక్షించామని, మిగిలిన వివరాలు ఇప్పుడే చెప్పలేమని స్పష్టం చేశారు. ఈ దాడికి ఎవరు కారణమనే విషయంపై ఇంకా స్పష్టత రాలేదు. యుద్ధం జరుగుతున్న వేళ ఈ ఘటన చోటుచేసుకోవడం ప్రాధాన్యత సంతరించుకుంది.
