ప్రపంచంలోని పలు యుద్ధ క్షేత్రాల్లో కనిపించే అమెరికాకు చెందిన మిలిటరీ కాంట్రాక్టర్ మాథ్యూ వాన్డైక్ను భారత భద్రతా బలగాలు అదుపులోకి తీసుకున్నాయి. దేశంలోని సున్నితమైన సరిహద్దు ప్రాంతాల్లో స్థానిక గ్రూపులకు అక్రమంగా ‘డ్రోన్ వార్ఫేర్’ (డ్రోన్లతో యుద్ధం)పై శిక్షణ ఇస్తున్నాడనే ఆరోపణలు ఆయనపై ఉన్నాయి. ఈ పరిణామం భారత గూఢచార, భద్రతా సంస్థలను తీవ్ర అప్రమత్తం చేసింది.
మాథ్యూ వాన్డైక్ ఒక సాధారణ పర్యాటకుడు కాదు. ఆయనొక ‘కాన్ఫ్లిక్ట్ డాక్యుమెంటరీ మేకర్’గా, ‘మిలిటరీ కాంట్రాక్టర్’గా పనిచేసిన అనుభవం ఉంది. 2011లో లిబియా అంతర్యుద్ధంలో పాల్గొని ఆరు నెలల పాటు జైలు శిక్ష అనుభవించాడు. ఆ తర్వాత సిరియా, ఇరాక్ వంటి దేశాల్లోనూ ఆయన కార్యకలాపాలు సాగించినట్లు తెలుస్తోంది. అలాంటి వ్యక్తి భారత సరిహద్దుల్లో పట్టుబడటం అనేక అనుమానాలకు తావిస్తోంది.
నిఘా వర్గాల సమాచారం ప్రకారం.. మాథ్యూ గత కొంతకాలంగా మణిపూర్, మయన్మార్ సరిహద్దుల్లో సంచరిస్తున్నాడు. అక్కడి కొన్ని బృందాలకు డ్రోన్లను ఆయుధాలుగా ఎలా వాడాలి, వాటితో దాడులు ఎలా చేయాలనే దానిపై శిక్షణ ఇస్తున్నట్లు భద్రతా బలగాలు గుర్తించాయి. భారత చట్టాల ప్రకారం, ఒక విదేశీయుడు ఇలాంటి కార్యకలాపాల్లో పాల్గొనడం తీవ్రమైన నేరం.
ఈ అరెస్ట్ భారత్, అమెరికా మధ్య దౌత్యపరమైన సమస్యలకు దారితీసే అవకాశం ఉంది. మాథ్యూ వ్యక్తిగతంగానే ఈ పనులు చేస్తున్నాడా? లేక దీని వెనుక ఏదైనా విదేశీ ఏజెన్సీ హస్తం ఉందా? అనే కోణంలో దర్యాప్తు సంస్థలు విచారణ జరుపుతున్నాయి. ప్రస్తుతం మాథ్యూ వాన్డైక్ను విచారిస్తున్న అధికారులు, అతని నుంచి కీలక సమాచారం రాబట్టే ప్రయత్నంలో ఉన్నారు. అతని వాంగ్మూలంతో సరిహద్దుల్లో జరుగుతున్న మరిన్ని రహస్య కార్యకలాపాలు వెలుగులోకి వచ్చే అవకాశం ఉందని భావిస్తున్నారు.
