- శృంగేరి అసెంబ్లీ నియోజకవర్గ రీకౌంటింగ్పై సుప్రీంకోర్టు స్టే
- కాంగ్రెస్ నేత టీడీ రాజేగౌడను ఎమ్మెల్యేగా పునరుద్ధరించిన అత్యున్నత న్యాయస్థానం
- రిటర్నింగ్ అధికారి అధికార పరిధిని దాటి వ్యవహరించారని కోర్టు ప్రాథమిక అంచనా
- తదుపరి విచారణను మే 21వ తేదీకి వాయిదా వేసిన ధర్మాసనం
కర్ణాటకలోని శృంగేరి అసెంబ్లీ నియోజకవర్గంలో వివాదాస్పదంగా మారిన రీకౌంటింగ్ ఫలితంపై సుప్రీంకోర్టు మంగళవారం స్టే విధించింది. రీకౌంటింగ్ ద్వారా బీజేపీ అభ్యర్థి డీఎన్ జీవరాజ్ ఎమ్మెల్యేగా ఎన్నిక కాగా, ఆ ప్రక్రియను నిలిపివేస్తూ అత్యున్నత న్యాయస్థానం మధ్యంతర ఉత్తర్వులు జారీ చేసింది. రీకౌంటింగ్కు ముందు ఉన్న యథాతథ స్థితిని (స్టేటస్ కో యాంటీ) పునరుద్ధరించాలని ఆదేశించింది. దీంతో, తొలుత విజేతగా ప్రకటించబడిన కాంగ్రెస్ అభ్యర్థి టీడీ రాజేగౌడకు భారీ ఊరట లభించినట్లయింది.
ఈ వ్యవహారంపై రాజేగౌడ దాఖలు చేసిన అప్పీల్ను జస్టిస్ సంజయ్ కుమార్, జస్టిస్ కే వినోద్ చంద్రన్ ధర్మాసనం విచారించింది. తిరస్కరణకు గురైన 279 పోస్టల్ బ్యాలెట్లను మాత్రమే పునఃపరిశీలించాలని కర్ణాటక హైకోర్టు ఆదేశించగా, రిటర్నింగ్ అధికారి మాత్రం రాజేగౌడకు అనుకూలంగా ఉన్న 562 చెల్లుబాటైన పోస్టల్ బ్యాలెట్లను కూడా తిరిగి లెక్కించారని రాజేగౌడ తరఫు న్యాయవాదులు కోర్టు దృష్టికి తెచ్చారు. రిటర్నింగ్ అధికారి చర్యలు ప్రాథమికంగా చెల్లవని ధర్మాసనం అభిప్రాయపడింది.
2023 అసెంబ్లీ ఎన్నికల్లో తొలుత రాజేగౌడ గెలిచినట్లు ప్రకటించారు. దీనిని సవాలు చేస్తూ బీజేపీ అభ్యర్థి జీవరాజ్ హైకోర్టును ఆశ్రయించగా, ఈ ఏడాది ఏప్రిల్లో రీకౌంటింగ్కు ఆదేశాలు వచ్చాయి. మే 2న జరిగిన రీకౌంటింగ్ అనంతరం, మే 3న జీవరాజ్ను 52 ఓట్ల మెజారిటీతో విజేతగా ప్రకటించారు.
తాజా విచారణ సందర్భంగా చెల్లుబాటైన బ్యాలెట్లను తిరిగి లెక్కించే ప్రసక్తే లేదని ధర్మాసనం స్పష్టం చేసింది. జీవరాజ్ తరఫు న్యాయవాది వాదనలను తోసిపుచ్చింది. రీకౌంటింగ్ ఆధారంగా తీసుకున్న అన్ని చర్యలు నిలిపివేయబడతాయని పేర్కొంటూ, తదుపరి విచారణను మే 21కి వాయిదా వేసింది. కాగా, బ్యాలెట్ బాక్సులను ట్యాంపరింగ్ చేశారన్న ఆరోపణలపై జీవరాజ్పై ఇప్పటికే ఎఫ్ఐఆర్ నమోదై ఉండటం గమనార్హం.
