- అమెరికా-చైనా వాణిజ్య ఉద్రిక్తతలకు తాత్కాలిక విరామం
- దక్షిణ కొరియా వేదికగా సమావేశమైన ట్రంప్, జిన్పింగ్
- ఫెంటనిల్ పేరుతో చైనాపై విధించిన 20 శాతం సుంకాలను 10 శాతానికి తగ్గిస్తున్నట్లు ట్రంప్ వెల్లడి
- జిన్పింగ్కు పదికి 12 మార్కులంటూ ప్రశంస
- అమెరికా నుంచి సోయాబీన్స్ కొనుగోళ్లను వెంటనే ప్రారంభిస్తామన్న చైనా
- కీలకమైన రేర్ ఎర్త్స్ ఎగుమతులపై వివాదానికి తెర
- ఫెంటానిల్ నియంత్రణకు కఠిన చర్యలు తీసుకుంటామని జిన్పింగ్ హామీ
- ఇరు దేశాల మధ్య త్వరలో ఉన్నత స్థాయి పర్యటనలకు ప్రణాళిక
చైనా అధినేత జీ జిన్పింగ్తో సమావేశం అనంతరం అమెరికా అధ్యక్షుడు డొనాల్డ్ ట్రంప్ కీలక ప్రకటన చేశారు. చైనా ఉత్పత్తులపై టారిఫ్ను 10 శాతం మేర తగ్గిస్తున్నట్లు ఆయన ప్రకటించారు. అమెరికా, చైనా దేశాల మధ్య వాణిజ్య ఉద్రిక్తతలు కొనసాగుతున్న వేళ ఇరుదేశాల అధినేతలు దక్షిణ కొరియా వేదికగా సమావేశమయ్యారు. దాదాపు రెండు గంటల పాటు అంతర్గతంగా సమావేశమై పలు అంశాలపై చర్చించారు.
సమావేశం అనంతరం ట్రంప్ మాట్లాడుతూ, జీ జిన్పింగ్తో భేటీ అద్భుతంగా జరిగిందని తెలిపారు. ఈ సమావేశంలో పలు అంశాలు చర్చకు వచ్చాయని అన్నారు. ఫెంటనిల్ తయారీలో ఉపయోగించే ముడి ఉత్పత్తుల రవాణాను కట్టడి చేసేందుకు జిన్పింగ్ తీవ్రంగా శ్రమిస్తారని విశ్వసిస్తున్నానని అన్నారు. అందుకే ఫెంటనిల్ పేరుతో చైనాపై విధించిన 20 శాతం సుంకాలను 10 శాతానికి తగ్గిస్తున్నట్లు వెల్లడించారు.
అదే సమయంలో అమెరికా సోయాబిన్ ఉత్పత్తుల కొనుగోళ్లను చైనా తక్షణమే పునరుద్ధరించేందుకు అంగీకారం కుదిరిందని ట్రంప్ వెల్లడించారు. అరుదైన ఖనిజాలకు సంబంధించిన సమస్య కూడా పరిష్కారమైనట్లు అమెరికా అధ్యక్షుడు తెలిపారు. చైనా నుంచి అమెరికాకు అరుదైన ఖనిజాల ఎగుమతులకు ఎలాంటి ఇబ్బంది ఉండబోదని అన్నారు. ఏడాది పాటు ఎగుమతి చేసేలా ఇరు దేశాల మధ్య ఒప్పందం కుదిరినట్లు తెలిపారు.
చైనా అధ్యక్షుడు జిన్పింగ్పై ట్రంప్ ప్రశంసలు కురిపించారు. జిన్పింగ్ గొప్ప నేత అని, ఆయనకు పదికి 12 మార్కులు ఇస్తానని అన్నారు. ఉక్రెయిన్-రష్యా యుద్ధం అంశంలో అమెరికాతో కలిసి పని చేసేందుకు చైనా అంగీకరించిందని అన్నారు. వచ్చే ఏడాది ఏప్రిల్లో తాను చైనాలో పర్యటిస్తానని ట్రంప్ తెలిపారు. ఆ తర్వాత వీలు చూసుకుని జిన్పింగ్ కూడా వస్తారని అన్నారు.
కొంతకాలంగా వాణిజ్య యుద్ధంతో అట్టుడుకుతున్న ప్రపంచంలోని రెండు అతిపెద్ద ఆర్థిక వ్యవస్థల మధ్య ఉద్రిక్తతలు తగ్గుముఖం పట్టాయి. అమెరికా అధ్యక్షుడు డొనాల్డ్ ట్రంప్, చైనా అధ్యక్షుడు షీ జిన్పింగ్ మధ్య గురువారం జరిగిన సమావేశం ఫలప్రదమైంది. ఈ భేటీ అమెరికా-చైనా సంబంధాలలో ఒక ‘అద్భుతమైన కొత్త ఆరంభం’ అని ట్రంప్ అభివర్ణించారు. చర్చల అనంతరం చైనాపై సుంకాలను 10 శాతం తగ్గిస్తున్నట్లు సంచలన ప్రకటన చేశారు. దీంతో పాటు పలు కీలక వాణిజ్య ఒప్పందాలు కుదిరినట్లు వెల్లడించారు.
దక్షిణ కొరియాలోని బుసాన్ నగరంలో ఇరు నేతలు దాదాపు రెండు గంటల పాటు రహస్యంగా చర్చలు జరిపారు. అనంతరం ట్రంప్ మీడియాతో మాట్లాడుతూ “ఇది ఒక అద్భుతమైన సమావేశం. ఎన్నో కీలక నిర్ణయాలు తీసుకున్నాం. ముఖ్యమైన అంశాలపై కుదిరిన ఒప్పందాలను త్వరలోనే అధికారికంగా ప్రకటిస్తాం” అని తెలిపారు. చైనా ఉత్పత్తులపై ప్రస్తుతం ఉన్న 57 శాతం సుంకాన్ని 47 శాతానికి తగ్గిస్తున్నట్లు ఆయన ప్రకటించారు. ఇది తమ సద్భావనకు నిదర్శనమని పేర్కొన్నారు.
రేర్ ఎర్త్స్.. సోయాబీన్స్పై పురోగతి
ఈ సమావేశంలో అత్యంత కీలకమైన పురోగతి రేర్ ఎర్త్స్ విషయంలో లభించింది. హైటెక్ తయారీ, రక్షణ పరికరాలకు అవసరమైన ఈ కీలక ఖనిజాల ఎగుమతులపై ఉన్న అడ్డంకులన్నీ తొలగిపోయాయని ట్రంప్ స్పష్టం చేశారు. ఏడాది పాటు ఎలాంటి ఆటంకాలు లేకుండా రేర్ ఎర్త్స్ను అమెరికాకు ఎగుమతి చేసేందుకు చైనా అంగీకరించిందని, ఈ ఒప్పందం భవిష్యత్తులోనూ కొనసాగుతుందని ఓ అమెరికా అధికారి తెలిపారు.
అదేవిధంగా, అమెరికా రైతులు ఎంతో ఆత్రుతగా ఎదురుచూస్తున్న సోయాబీన్స్ కొనుగోళ్లను చైనా వెంటనే ప్రారంభిస్తుందని ట్రంప్ చెప్పారు. “భారీ మొత్తంలో సోయాబీన్స్, ఇతర వ్యవసాయ ఉత్పత్తులను కొనుగోలు చేసేందుకు చైనా అంగీకరించింది. ఇది మా రైతులకు గొప్ప విజయం” అని ఆయన అన్నారు.
ఫెంటానిల్పై హామీ.. పర్యటనలకు ప్రణాళిక
అమెరికాలో ఒపియాయిడ్ సంక్షోభానికి కారణమవుతున్న ఫెంటానిల్ అనే డ్రగ్ ఉత్పత్తిని అరికట్టేందుకు కఠిన చర్యలు తీసుకుంటామని జిన్పింగ్ హామీ ఇచ్చినట్లు ట్రంప్ వెల్లడించారు. ఈ భేటీ పట్ల పూర్తి సంతృప్తి వ్యక్తం చేసిన ఆయన, “పదికి పన్నెండు మార్కులు వేస్తాను” అని వ్యాఖ్యానించారు. సంబంధాలను మరింత బలోపేతం చేసే దిశగా, తాను వచ్చే ఏడాది ఏప్రిల్లో చైనాలో పర్యటిస్తానని, ఆ తర్వాత జిన్పింగ్ అమెరికాకు వస్తారని ట్రంప్ ప్రకటించారు. ఆసక్తికరంగా, ఈ చర్చల్లో తైవాన్ అంశం అసలు ప్రస్తావనకే రాలేదని ఆయన చెప్పడం గమనార్హం.
