మదురోకు 8 ఇళ్లు… ఏ ఇంట్లో ఉంటాడో తెలియదు… అయినా పట్టుకున్నారు!

• ‘ఆపరేషన్ అబ్సల్యూట్ రిజాల్వ్’ పేరుతో వెనిజులా అధ్యక్షుడు మదురో అరెస్ట్
• నెలల తరబడి సీఐఏ రహస్య నిఘా, డెల్టా ఫోర్స్ ప్రత్యేక రిహార్సల్స్
• వాతావరణం కారణంగా నాలుగు రోజులు ఆలస్యమైన అమెరికా సైనిక చర్య
• పదుల సంఖ్యలో పౌరులు, సైనికులు మృతి చెందినట్లు వెనెజువెలా ఆరోపణ
• వెనెజువెలాను మేమే నడిపిస్తాం, చమురు తీసుకుంటాం అని ప్రకటించిన ట్రంప్

అమెరికా స్పెషల్ ఫోర్సెస్ అత్యంత సాహసోపేతంగా నిర్వహించిన ఓ హై-రిస్క్ ఆపరేషన్‌లో వెనెజువెలా అధ్యక్షుడు నికోలస్ మదురోను అరెస్ట్ చేశారు. ‘ఆపరేషన్ అబ్సల్యూట్ రిజాల్వ్’ అనే కోడ్‌నేమ్‌తో శనివారం తెల్లవారుజామున జరిగిన ఈ మెరుపుదాడిలో మదురోను బంధించి, అమెరికాకు తరలించారు. ఫెడరల్ డ్రగ్ ట్రాఫికింగ్ ఆరోపణలపై విచారణ ఎదుర్కోవడానికి ఆయన్ను యూఎస్‌కు తీసుకొచ్చారు. నెలల తరబడి సీఐఏ సాగించిన రహస్య నిఘా, సైనిక దళాల కఠినమైన రిహార్సల్స్, చివరి నిమిషంలో వాతావరణ మార్పుల వల్ల కలిగిన జాప్యం అనంతరం ఈ ఆపరేషన్‌ను విజయవంతంగా పూర్తి చేసినట్లు అమెరికా అధికారులు దీనిని ఒక “పర్ఫెక్ట్” ఆపరేషన్‌గా అభివర్ణించారు.

నెలల తరబడి రహస్య నిఘా, పక్కా ప్రణాళిక

ఈ మిషన్‌కు సంబంధించిన వివరాల ప్రకారం, గత ఏడాది ఆగస్టులోనే ఒక రహస్య సీఐఏ బృందం వెనెజువెలాలో ప్రవేశించింది. ట్రంప్ ప్రభుత్వం ‘నార్కో-టెర్రరిస్ట్’గా ముద్రవేసిన మదురో కదలికలపై నిఘా పెట్టింది. కరాకస్‌లో యూఎస్ రాయబార కార్యాలయం మూతపడటంతో, ఈ బృందం ఎలాంటి దౌత్యపరమైన రక్షణ లేకుండానే నెలల తరబడి పనిచేసింది. మదురో రోజువారీ కార్యకలాపాలు, ఆయన తినే ఆహారం, పెంచుకునే జంతువుల వివరాలతో సహా అత్యంత కీలకమైన సమాచారాన్ని సీఐఏ సేకరించింది. 

ఇందుకోసం స్టెల్త్ డ్రోన్ల ద్వారా నిఘా, మదురోకు అత్యంత సన్నిహితంగా ఉండే మానవ వనరుల ద్వారా సమాచారాన్ని సేకరించినట్లు న్యూయార్క్ టైమ్స్ కథనం పేర్కొంది. ఈ నిఘా సమాచారం వల్లే మదురో దినచర్యను కచ్చితంగా అంచనా వేయగలిగామని, ఇది సైనిక ఆపరేషన్‌కు కీలకంగా మారిందని జాయింట్ చీఫ్స్ ఆఫ్ స్టాఫ్ ఛైర్మన్ జనరల్ డాన్ కైన్ తెలిపారు.

ఒకవైపు నిఘా కొనసాగుతుండగానే, మరోవైపు కెంటకీలో జాయింట్ స్పెషల్ ఆపరేషన్స్ కమాండ్ (JSOC) ఆధ్వర్యంలో మదురో నివాస సముదాయాన్ని పోలి ఉండే ఒక డూప్లికేట్ ఇంటిని నిర్మించారు. డెల్టా ఫోర్స్ కమాండోలు మదురోను ఎలా అరెస్ట్ చేయాలో ఈ డూప్లికేట్ ఇంటి వద్ద పదేపదే రిహార్సల్స్ చేశారు. వేగంగా కాంపౌండ్‌లోకి ప్రవేశించడం, ఉక్కు తలుపులను ఛేదించడం, నిమిషాల వ్యవధిలో భవనాన్ని ఆధీనంలోకి తీసుకోవడం వంటి అంశాలపై ప్రత్యేకంగా దృష్టి సారించారు. అయితే, మదురో తరచూ 6 నుంచి 8 ఇళ్ల మధ్య మారుతూ ఉండటం, రాత్రి ఎక్కడ బస చేస్తాడనేది చివరి నిమిషంలో నిర్ణయించుకోవడం అమెరికా వ్యూహకర్తలకు పెద్ద సవాలుగా మారింది.

విఫలమైన చర్చలు, పెరిగిన ఒత్తిడి

దాడికి కొన్ని నెలల ముందు నుంచి అమెరికా మదురోపై తీవ్ర ఒత్తిడి పెంచింది. ఆపరేషన్‌కు వారం ముందు వెనెజువెలా పోర్ట్ ఫెసిలిటీపై సీఐఏ డ్రోన్ దాడి చేసింది. మరోవైపు, కరీబియన్, తూర్పు పసిఫిక్ ప్రాంతాల్లో యూఎస్ మిలిటరీ వివాదాస్పద రీతిలో దాడులు చేసి, డజన్ల కొద్దీ పడవలను ధ్వంసం చేసి, 115 మందిని హతమార్చింది. అమెరికా దాడిని నివారించేందుకు మదురో, వెనెజువెలా చమురు నిల్వలను అమెరికాకు అప్పగించేందుకు ముందుకొచ్చారని, డిసెంబర్ 23న టర్కీకి వెళ్లేందుకు అనుమతించాలని ప్రతిపాదించారని, అయితే అమెరికా ఆ ప్రతిపాదనను తిరస్కరించినట్లు న్యూయార్క్ టైమ్స్ నివేదించింది.

ట్రంప్ తుది ఆదేశాలు.. వాతావరణంతో జాప్యం

డిసెంబర్ 25 నాటికి సైనిక చర్యకు అధ్యక్షుడు డొనాల్డ్ ట్రంప్ అనుమతి ఇచ్చినా, సమయాన్ని మాత్రం పెంటగాన్, స్పెషల్ ఆపరేషన్స్ వ్యూహకర్తలకే వదిలేశారు. క్రిస్మస్ సెలవుల కాలంలో చాలా మంది వెనెజువెలా అధికారులు, సైనికులు సెలవుల్లో ఉంటారనేది అమెరికా వ్యూహంలో భాగం. దాడికి కొన్ని రోజుల ముందు, స్పెషల్ ఆపరేషన్స్ ఎయిర్‌క్రాఫ్ట్‌లు, ఎలక్ట్రానిక్ వార్‌ఫేర్ విమానాలు, రీపర్ డ్రోన్లు, ఫైటర్ జెట్లతో సహా భారీ సైనిక సంపత్తిని అమెరికా ఆ ప్రాంతానికి తరలించింది. అయితే, అనూహ్యంగా వాతావరణం క్షీణించడంతో ఆపరేషన్ నాలుగు రోజులు ఆలస్యమైంది. శుక్రవారం రాత్రి 10:46 గంటలకు మార్-ఎ-లాగో నుంచి ట్రంప్ తుది అనుమతి ఇచ్చారు.

మెరుపుదాడి.. అరెస్ట్

ఆపరేషన్ ప్రారంభానికి ముందు, వెనెజువెలా రాజధాని కారకాస్‌లో సైబర్ దాడి ద్వారా విద్యుత్ సరఫరాను నిలిపివేశారు. దీంతో అమెరికా విమానాలు, హెలికాప్టర్లు శత్రువుల కంటపడకుండా సులభంగా ముందుకు సాగాయి. 20 స్థావరాల నుంచి 150కి పైగా యూఎస్ ఎయిర్‌క్రాఫ్ట్‌లు, డ్రోన్లు, ఫైటర్లు, బాంబర్లు ఈ ఆపరేషన్‌లో పాల్గొన్నాయి. శనివారం తెల్లవారుజామున, వెనెజువెలా రాడార్, ఎయిర్ డిఫెన్స్ వ్యవస్థలపై అమెరికా యుద్ధ విమానాలు దాడులు చేశాయి. ఈ దాడుల్లో 40 మంది పౌరులు, సైనికులు మరణించారని ఒక సీనియర్ వెనెజువెలా అధికారి తెలిపారు. ఎయిర్ డిఫెన్స్ వ్యవస్థలను నిర్వీర్యం చేసినప్పటికీ, మదురో కాంపౌండ్ వైపు వస్తున్న యూఎస్ హెలికాప్టర్లపై ఎదురుదాడి జరిగింది. ఈ దాడిలో ఒక హెలికాప్టర్ దెబ్బతినగా, అరడజను మంది యూఎస్ సైనికులు గాయపడ్డారు.

అనంతరం, డెల్టా ఫోర్స్ ఆపరేటర్లు పేలుడు పదార్థాలతో కాంపౌండ్‌లోకి ప్రవేశించి, కేవలం 5 నిమిషాల్లోనే మదురోను, ఆయన భార్యను అదుపులోకి తీసుకున్నారు. వారిని హెలికాప్టర్‌లో కరీబియన్‌లోని యూఎస్‌ఎస్ ఐవో జిమా నౌకకు, అక్కడి నుంచి గ్వాంటనామో బేకు, ఆ తర్వాత న్యూయార్క్ సమీపంలోని సైనిక విమానాశ్రయానికి తరలించారు.

దాడి అనంతరం ట్రంప్ మాట్లాడుతూ.. అవసరమైతే మరిన్ని దాడులకు సిద్ధంగా ఉన్నామని, ఇతర వెనెజువెలా నాయకులను కూడా లక్ష్యంగా చేసుకుంటామని హెచ్చరించారు. అంతేకాకుండా, వెనెజువెలాలో సురక్షితమైన, సరైన పరివర్తన జరిగే వరకు ఆ దేశాన్ని అమెరికాయే నడిపిస్తుందని, అక్కడి విస్తారమైన చమురు నిల్వలను ఇకపై అమెరికా వినియోగించుకుంటుందని ప్రకటించారు. ఈ మిషన్ వ్యూహాత్మకంగా విజయవంతమైనప్పటికీ, పౌర మరణాలు, ఆపరేషన్ చట్టబద్ధత, వెనెజువెలా అమెరికా దీర్ఘకాలిక పాత్రపై అనేక ప్రశ్నలు తలెత్తుతున్నాయి.

• వెనెజువెలా అధ్యక్షుడి భార్య సిలియా ఫ్లోరెస్ పై అమెరికా తీవ్ర ఆరోపణలు
• డ్రగ్స్ ముఠాలకు సహకరించేందుకు లంచాలు తీసుకున్నారని అభియోగం
• అధ్యక్షుడి హ్యాంగర్ నుంచే కొకైన్ రవాణా చేశారని కుటుంబ సభ్యులపై కేసు
• అధ్యక్షుడు మదురోపై కూడా నార్కో టెర్రరిజం ఆరోపణలు 
• దేశంలో అత్యంత శక్తివంతమైన మహిళగా సిలియాకు పేరు

వెనెజువెలా అధ్యక్షుడు నికోలస్ మదురో, ఆయన భార్య సిలియా ఫ్లోరెస్ ప్రస్తుతం అమెరికా కస్టడీలో ఉన్న సంగతి తెలిసిందే. శనివారం నాడు నిర్వహించిన ఆపరేషన్ లో అమెరికా బలగాలు మదురోను, ఆయన భార్యను అదుపులోకి తీసుకుని అమెరికా తరలించారు. కాగా, వెనెజువెలా దేశంలో అత్యంత శక్తివంతమైన మహిళగా భావించే సిలియా ఫ్లోరెస్ పై అమెరికా ప్రాసిక్యూటర్లు సంచలన ఆరోపణలు చేశారు. మాదకద్రవ్యాల రవాణాను సులభతరం చేసేందుకు ఆమె లంచాలు స్వీకరించారని, దేశంలోని యాంటీ-డ్రగ్ కార్యాలయాన్ని తన ప్రయోజనాల కోసం వాడుకున్నారని తీవ్రమైన అభియోగాలు మోపారు. ఈ పరిణామం మదురో ప్రభుత్వానికి అంతర్జాతీయంగా తీవ్ర ఇబ్బందులు తెచ్చిపెట్టింది.

అమెరికా ఇండిక్ట్‌మెంట్ ప్రకారం, డ్రగ్స్ రవాణాను సులభతరం చేసేందుకు సిలియా ఫ్లోరెస్ లక్షలాది డాలర్ల లంచాలు స్వీకరించినట్లు ఆరోపణలున్నాయి. 2007లో ఓ ప్రముఖ డ్రగ్ ట్రాఫికర్‌ను, అప్పటి వెనెజువెలా జాతీయ యాంటీ-డ్రగ్ కార్యాలయ డైరెక్టర్ నెస్టర్ రెవెరోల్ టోరెస్‌కు పరిచయం చేసేందుకు ఆమె ఈ లంచాలు తీసుకున్నారని పేర్కొన్నారు. ఆ తర్వాత ఆ డ్రగ్స్ స్మగ్లర్, డైరెక్టర్‌కు నెలవారీ లంచాలతో పాటు, కొకైన్‌తో వెళ్లే ప్రతి విమానానికి సుమారు 1 లక్ష డాలర్లు చెల్లించేలా ఒప్పందం కుదిరింది. ఈ మొత్తంలో కొంత భాగం సిలియా ఫ్లోరెస్ కు చేరినట్లు అమెరికా ఆరోపిస్తోంది. నెస్టర్ రెవెరోల్‌పై 2015లోనే న్యూయార్క్‌లో నార్కోటిక్స్ కేసు నమోదైంది. ప్రస్తుతం ఆయన పరారీలో ఉన్నారు.

సిలియా ఫ్లోరెస్ కుటుంబ సభ్యులపై కూడా మాదకద్రవ్యాల కార్యకలాపాలకు సంబంధించి తీవ్రమైన కేసులున్నాయి. ఆమె సోదరి కుమారులకు 2017లో ఓ డ్రగ్స్ కేసుకు సంబంధించి అమెరికాలో 18 ఏళ్ల జైలు శిక్ష పడింది. దేశాధ్యక్షుడి విమానాలు నిలిపే హ్యాంగర్ నుంచే కొకైన్ అక్రమ రవాణా చేశారన్నది వీరిపై ఉన్న అభియోగం. అయితే, 2022లో ఏడుగురు అమెరికన్ల విడుదలకు బదులుగా జరిగిన ఖైదీల మార్పిడిలో వీరిని విడుదల చేశారు.

ఒకప్పుడు సాధారణ న్యాయవాదిగా ఉన్న సిలియా ఫ్లోరెస్, 1990లలో మాజీ అధ్యక్షుడు హ్యూగో చావెజ్ సోషలిస్ట్ ఉద్యమంలో చేరి రాజకీయంగా ఉన్నత స్థాయికి ఎదిగారు. చట్టసభల్లో కీలక పాత్ర పోషించిన ఆమె, 1990ల చివరి నుంచి నికోలస్ మదురోతో సన్నిహితంగా ఉన్నారు. 2013లో ఆయన్ను వివాహం చేసుకున్నారు. మదురో అధికారాన్ని పటిష్టం చేయడంలో ఆమె కీలక పాత్ర పోషించారు. అధికారికంగా ఏ పదవిలో లేకపోయినా, తెరవెనుక దేశంలో అత్యంత శక్తివంతమైన వ్యక్తిగా సిలియా ఫ్లోరెస్ చక్రం తిప్పుతున్నారని పేరుంది.

ఈ ఆరోపణలు కేవలం సిలియా ఫ్లోరెస్ కే పరిమితం కాలేదు. తన భర్త నికోలస్ మదురో, కుమారుడితో కలిసి ఫ్లోరెస్ తమ రాజకీయ అధికారాన్ని డ్రగ్స్ రవాణాకు అనుకూలంగా మార్చుకున్నారని అమెరికా ప్రాసిక్యూటర్లు ఆరోపిస్తున్నారు. మదురోపై నార్కో-టెర్రరిజం, కొకైన్ స్మగ్లింగ్ కుట్ర, ఆయుధాల వినియోగం వంటి పలు తీవ్రమైన అభియోగాలు ఉన్నాయి. మొత్తం మీద, ఈ ఆరోపణలు వెనెజువెలా రాజకీయాల్లో మాదకద్రవ్యాల మాఫియా పాత్రను, అధికార దుర్వినియోగాన్ని స్పష్టం చేస్తున్నాయి. ఈ కేసులతో సిలియా ఫ్లోరెస్ పాత్ర మరింత వివాదాస్పదంగా మారింది.