- రష్యా విదేశాంగ మంత్రి లవ్రోవ్తో ఇరాన్ మంత్రి ఫోన్
- ఐక్యరాజ్యసమితి భద్రతా మండలి అత్యవసర సమావేశానికి ఇరాన్ డిమాండ్
- దాడులు అంతర్జాతీయ చట్టాల ఉల్లంఘనేనన్న రష్యా
- ఇరాన్లో మేజర్ కంబాట్ ఆపరేషన్స్ ధృవీకరించిన డొనాల్డ్ ట్రంప్
ఇరాన్పై అమెరికా, ఇజ్రాయెల్ సంయుక్తంగా జరిపిన సాయుధ దాడులను రష్యా తీవ్రంగా ఖండించింది. ఇవి ఎటువంటి కవ్వింపు చర్యలు లేకుండా చేసిన దాడులని, వెంటనే పరిస్థితిని చక్కదిద్ది రాజకీయ, దౌత్యపరమైన పరిష్కారం దిశగా అడుగులు వేయాలని రష్యా సూచించింది. ఈ మేరకు శనివారం రష్యా విదేశాంగ శాఖ ఒక ప్రకటన విడుదల చేసింది.
శనివారం ఇరాన్ విదేశాంగ మంత్రి సయ్యద్ అబ్బాస్ అరాఘ్చి.. రష్యా విదేశాంగ మంత్రి సెర్గీ లవ్రోవ్కు ఫోన్ చేసి తాజా పరిస్థితులను వివరించారు. అమెరికా, ఇజ్రాయెల్ దాడులను తిప్పికొట్టేందుకు ఇరాన్ తీసుకుంటున్న చర్యలను ఆయన లవ్రోవ్కు తెలిపారు. శాంతియుత చర్చలకు ఈ దాడులు విఘాతం కలిగించాయని, దీనిపై అత్యవసరంగా ఐక్యరాజ్యసమితి భద్రతా మండలి సమావేశాన్ని ఏర్పాటు చేయాలని యోచిస్తున్నట్లు ఇరాన్ మంత్రి పేర్కొన్నారు.
దీనిపై స్పందించిన లవ్రోవ్.. ఇరాన్పై జరిగిన దాడులు అంతర్జాతీయ చట్టాలను, నిబంధనలను ఉల్లంఘించడమేనని ఆగ్రహం వ్యక్తం చేశారు. ఈ దాడులు ప్రాంతీయ, ప్రపంచ భద్రతకు తీవ్ర ముప్పు కలిగిస్తాయని ఆందోళన వ్యక్తం చేశారు. దాడులను తక్షణమే నిలిపివేయాలని కోరారు. ఐక్యరాజ్యసమితి వేదికగా శాంతియుత పరిష్కారాల కోసం రష్యా తన వంతు సహకారం అందిస్తుందని భరోసా ఇచ్చారు.
మరోవైపు, ఇరాన్లో ‘మేజర్ కంబాట్ ఆపరేషన్స్’ (భారీ స్థాయి పోరాట చర్యలు) ప్రారంభించినట్లు అమెరికా అధ్యక్షుడు డొనాల్డ్ ట్రంప్ ధృవీకరించారు. కాగా, తాము అమెరికాతో దౌత్యపరమైన చర్చల్లో ఉండగానే ఈ దాడులు జరిగాయని ఇరాన్ విదేశాంగ శాఖ ఆరోపించింది. ఐక్యరాజ్యసమితి సెక్రటరీ జనరల్ వెంటనే స్పందించి ఈ దురాక్రమణను అడ్డుకోవాలని ఇరాన్ డిమాండ్ చేసింది.
