- భెజ్జీ ప్రాంతంలో శుక్రవారం తెల్లవారుజామున ఎన్కౌంటర్
- ఒడిశా మీదుగా ఛత్తీస్‌గఢ్‌లోకి నక్సలైట్లు ప్రవేశిస్తున్నారనే సమాచారంతో డీఆర్‌జీ ఆపరేషన్
- ఎన్కౌంటర్ జరిగినట్లు ఎస్పీ కిరణ్ చవాన్ ధ్రువీకరణ
ఛత్తీస్‌గఢ్‌లోని కొంటాలో భద్రతా దళాలతో జరిగిన ఎన్‌కౌంటర్‌లో పది మంది మావోయిస్టులు మరణించారు. భెజ్జీ ప్రాంతంలో శుక్రవారం తెల్లవారుజామున ఈ ఎన్కౌంటర్ జరిగినట్లు సూపరింటెండెంట్ ఆఫ్ పోలీస్ కిరణ్ చవాన్ ధ్రువీకరించారు.
ఘ‌ట‌నాస్థ‌లి నుంచి భద్రతా దళాలు మూడు ఆటోమేటిక్ తుపాకులు సహా ప‌లు ఆయుధాలను స్వాధీనం చేసుకున్నాయి. ఒడిశా మీదుగా ఛత్తీస్‌గఢ్‌లోకి నక్సలైట్లు ప్రవేశిస్తున్నారనే ప‌క్కా సమాచారంతో డిస్ట్రిక్ట్ రిజర్వ్ గార్డ్ (డీఆర్‌జీ) ఈ ఆపరేషన్ చేప‌ట్టింది.
కాగా, ఎన్కౌంటర్ జరిగినట్లు బస్తర్‌ ఇన్‌స్పెక్టర్‌ జనరల్ పి.సుందర్‌రాజ్ కూడా ధ్రువీకరించారు. అయితే, మృతుల సంఖ్య, స్వాధీనం చేసుకున్న ఆయుధాల వివ‌రాల‌ను ఆయ‌న వెల్ల‌డించ‌లేదు. ప్ర‌స్తుతం ఇంకా కాల్పులు జరుగుతూనే ఉన్నాయ‌ని వార్తా సంస్థ పీటీఐ పేర్కొంది.
ఇదిలాఉంటే.. గత నెలలో ఛత్తీస్‌గఢ్‌లోని నారాయణ్‌పూర్-దంతెవాడ సరిహద్దుల్లోని అటవీప్రాంతంలో 31 మంది మావోయిస్టులను భద్రతా దళాలు కాల్చి చంపిన విష‌యం తెలిసిందే. ఈ ఎన్కౌంటర్ స‌మ‌యంలోనూ భద్రతా దళాలు భారీ మొత్తంలో ఆయుధాలు స్వాధీనం చేసుకున్నాయి.
పోలీసు ఇన్‌ఫార్మర్లు అనే అనుమానంతో ఇద్దరిని హ‌త‌మార్చిన మావోయిస్టులు
- తెలంగాణలోని ములుగు జిల్లా వాజేడు మండల కేంద్రంలో ఘటన
- మృతులు ఉయికా రమేష్, ఉయికా అర్జున్‌గా గుర్తింపు
- వీరిద్దరిపై పదునైన ఆయుధాలతో దాడి చేసి చంపిన మావోయిస్టులు
తెలంగాణలోని ములుగు జిల్లాలో పోలీస్ ఇన్‌ఫార్మర్లు అనే అనుమానంతో ఇద్దరు వ్యక్తులను మావోయిస్టులు నరికి చంపారు. ఈ ఘటన గురువారం అర్థరాత్రి చోటుచేసుకుంది. వాజేడు మండల కేంద్రంలోని పెనుగోలు కాలనీలో మావోయిస్టులు ఈ దారుణానికి పాల్పడ్డారు.
మృతులను స్థానికంగా నివాసం ఉంటున్న ఉయికా రమేష్, ఉయికా అర్జున్‌గా గుర్తించారు. రమేష్ అదే మండలంలోని పేరూరు గ్రామపంచాయతీ కార్యదర్శిగా ఉన్నారు. మావోయిస్టుల బృందం వీరిద్దరిపై పదునైన ఆయుధాలతో దాడి చేయడంతో అక్కడికక్కడే మృతి చెందారు.
మృతులు ఇద్దరూ తమకు సంబంధించిన సమాచారాన్ని సేకరిస్తున్నారని, మావోయిస్టు వ్యతిరేక కార్యకలాపాలలో పాల్గొన్న రాష్ట్ర పోలీసు ఉన్నత సంస్థ అయిన స్పెషల్ ఇంటెలిజెన్స్ బ్యూరో (ఎస్ఐబీ)కి పంపుతున్నారని మావోయిస్టులు మృతదేహాల వ‌ద్ద ఒక నోట్‌ను వదిలివెళ్లారు. ఈ నోట్‌పై సీపీఐ (మావోయిస్ట్‌) వాజేడు-వెంకటాపురం ఏరియా కార్యదర్శి శాంత సంతకం ఉన్న‌ట్లు స‌మాచారం.
ఈ హత్యలకు బాధ్యత వహిస్తూ శాంత కూడా ఒక ప్రకటన విడుదల చేశారు. ఒకప్పుడు తమకు కంచుకోటగా ఉన్న తెలంగాణలో తమ కార్యకలాపాలను పునరుద్ధరించేందుకు మావోయిస్టులు చేస్తున్న ప్రయత్నాల నేప‌థ్యంలోనే ఈ హ‌త్య జరిగింది.
గత 10-15 ఏళ్లుగా తెలంగాణలో మావోయిస్టుల ప్ర‌భావం దాదాపు కనుమరుగైందని, ఛత్తీస్‌గఢ్, మహారాష్ట్ర వంటి పొరుగు రాష్ట్రాల సరిహద్దు ప్రాంతాల్లో ఇప్పటికీ వారి ఉనికి ఉందని పోలీసులు చెబుతున్నారు.
