ఆస్ట్రేలియాలోని తాజా సమాఖ్య ఎన్నికలు అనేక ఉత్కంఠలకు తెరదించాయి. ప్రజలు తమ ఓటుతో మరోసారి లేబర్ పార్టీకి విజయాన్ని కట్ట బెట్టారు. ఆ పార్టీ నాయకుడు, ప్రస్తుత ప్రధాన మంత్రి ఆంథోనీ అల్బనీస్ మరో సారి అధికారాన్ని చేపట్టే అవకాశం దక్కించుకున్నారు. ఇది కేవలం ఒక గెలుపు మాత్రమే కాదు, ఇది ఆయన నాయకత్వంపై ప్రజల మళ్లీ పెట్టిన మద్దతు అనే చెప్పాలి. ఈ ఎన్నికల్లో అనూహ్య పరిణామం ఏంటంటే, ప్రతి పక్ష లిబరల్ పార్టీ నాయకుడు పీటర్ డట్టన్ బ్రిస్బేన్లోని తన సొంత డిక్సన్ సీటును కోల్పోవడం. లేబర్ పార్టీ అభ్యర్థి అలీ ఫ్రాన్స్ చేతిలో ఆయన ఓడిపోవడం ఆ పార్టీ శిబిరాన్ని షాక్కి గురి చేసింది. గతంలో 2007లో అప్పటి ప్రధాని జాన్ హోవార్డ్ తన సొంత స్థానాన్ని కోల్పోయిన ఘటన తరవాత, ఇప్పుడు మరో సారి ఓ ప్రధాన నాయకుడు ఓడిపోవడం రాజకీయంగా చర్చకు దారితీసింది.
