ఆయుష్ ఆసుపత్రి నుంచి వల్లభనేని వంశీ డిశ్చార్జి

• మాజీ ఎమ్మెల్యే వల్లభనేని వంశీ ఆసుపత్రి నుంచి డిశ్చార్జ్
• మూడు రోజుల చికిత్స అనంతరం తిరిగి విజయవాడ జైలుకు!
• శ్వాసకోశ సమస్యలతో ఆయుష్ ఆస్పత్రిలో చేరిన వంశీ
• కోర్టు ఆదేశాలతో వంశీకి వైద్యం 
• వంశీ ఆరోగ్యంపై జూన్ 5న కోర్టుకు వైద్య నివేదిక
• పలు కేసుల్లో రిమాండ్ ఖైదీగా ఉన్న వంశీ

అనారోగ్య కారణాలతో విజయవాడలోని ఆయుష్ ఆసుపత్రిలో చికిత్స పొందిన వైసీపీ నేత, గన్నవరం మాజీ ఎమ్మెల్యే వల్లభనేని వంశీ నేడు డిశ్చార్జ్ అయ్యారు. ఆరోగ్యం కుదుటపడటంతో వైద్యులు ఆయనను డిశ్చార్జ్ చేయగా, పోలీసులు తిరిగి విజయవాడ జిల్లా జైలుకు తరలించారు. గత కొద్ది రోజులుగా శ్వాస సంబంధిత సమస్యలతో ఇబ్బంది పడుతున్న వల్లభనేని వంశీని, న్యాయస్థానం ఆదేశాల మేరకు పోలీసులు మూడు రోజుల క్రితం విజయవాడ ఆయుష్ ఆసుపత్రిలో చేర్పించారు. అక్కడ వైద్యుల బృందం ఆయనకు ప్రత్యేక చికిత్స అందించింది. శ్వాస తీసుకోవడంలో ఉన్న ఇబ్బందులకు సంబంధించి అవసరమైన వైద్య సేవలు చేశారు. ప్రస్తుతం ఆయన ఆరోగ్య పరిస్థితి సాధారణ స్థితికి చేరుకుందని వైద్యులు నిర్ధారించారు. దీంతో ఇవాళ ఆయన్ను ఆసుపత్రి నుంచి డిశ్చార్జ్ చేసేందుకు అనుమతించారు.  కాగా, వల్లభనేని వంశీ ఆరోగ్య స్థితిగతులపై సమగ్రమైన నివేదికను ఈ నెల 5వ తేదీన కోర్టుకు సమర్పించనున్నట్లు ఆయుష్ ఆసుపత్రి వర్గాలు తెలిపాయి. వివిధ కేసుల్లో ఆరోపణలు ఎదుర్కొంటున్న వంశీ, ప్రస్తుతం విజయవాడ జిల్లా జైలులో రిమాండ్ ఖైదీగా ఉన్నారు. కొన్ని కేసులకు సంబంధించి లోతైన విచారణ నిమిత్తం పోలీసులు ఆయనను కస్టడీకి తీసుకుని విచారించిన సందర్భాలు కూడా ఉన్నాయి. ఈ క్రమంలోనే ఆయన పలుమార్లు అస్వస్థతకు గురైనట్లు సమాచారం. ముఖ్యంగా శ్వాస తీసుకోవడంలో తీవ్ర ఇబ్బందులు ఎదుర్కొనడంతో, గతంలో కూడా ఆయనను ఆసుపత్రికి తరలించి చికిత్స అందించారు. పూర్తి స్థాయి వైద్య పరీక్షలు, మెరుగైన చికిత్స అవసరమని భావించిన నేపథ్యంలో, కోర్టు అనుమతితో ఆయనను ఆయుష్ ఆసుపత్రిలో చేర్పించి చికిత్స చేయించారు. ఆయన ఆరోగ్య పరిస్థితిపై వైద్యులు సమర్పించబోయే నివేదిక కోర్టులో కీలకం కానుంది.