• ఏవోబీలో జరిగిన ఎన్‌కౌంటర్‌లో మావోయిస్టు కీలక నేత టెక్ శంకర్ మృతి
• మందుపాతరలు, ఐఈడీల తయారీలో నిపుణుడు
• గాజర్ల రవి మరణం తర్వాత ఏవోబీ పునర్నిర్మాణ బాధ్యతలు
• మాగుంట, కిడారి హత్య కేసుల్లో కీలక పాత్రధారి
• శంకర్ తలపై రూ. 20 లక్షల రివార్డు ప్రకటించిన ప్రభుత్వం

మావోయిస్టు పార్టీకి ఆంధ్ర-ఒడిశా సరిహద్దు (ఏవోబీ)లో భారీ ఎదురుదెబ్బ తగిలింది. పార్టీ స్పెషల్ జోనల్ కమిటీ సభ్యుడు, టెక్నికల్ టీమ్ ఇన్‌చార్జి మెట్టూరు జోగారావు అలియాస్ టెక్ శంకర్ (51) ఎన్‌కౌంటర్‌లో మరణించారు. అల్లూరి సీతారామరాజు జిల్లా మారేడుమిల్లి అటవీ ప్రాంతంలోని జీఎంవలస వద్ద బుధవారం భద్రతా బలగాలకు, మావోయిస్టులకు మధ్య జరిగిన ఎదురుకాల్పుల్లో ఆయన మృతి చెందాడు.

ఐఈడీలు, మందుపాతరల తయారీలో టెక్ శంకర్ దిట్టగా పేరుపొందారు. ఇటీవల హతమైన అగ్రనేత హిడ్మా నేతృత్వంలో జరిగిన అనేక దాడులకు ఈయనే సాంకేతిక సహకారం అందించినట్లు తెలుస్తోంది. ఈ ఏడాది జూన్‌లో ఏవోబీ కార్యదర్శి గాజర్ల రవి (ఉదయ్) మరణించడంతో, పార్టీ పునర్నిర్మాణం కోసం కేంద్ర కమిటీ శంకర్‌ను ఏవోబీకి పంపింది. కీలక సమయంలో ఆయన మృతి చెందడం పార్టీకి కోలుకోలేని నష్టమని విశ్లేషకులు భావిస్తున్నారు.

శ్రీకాకుళం జిల్లా వజ్రపుకొత్తూరు మండలం బాతుపురం గ్రామానికి చెందిన జోగారావు, 36 ఏళ్లుగా అజ్ఞాతంలో ఉన్నారు. 30 ఏళ్ల క్రితం ఒంగోలు ఎంపీ మాగుంట సుబ్బరామిరెడ్డి హత్య కేసుతో పాటు, అరకు మాజీ ఎమ్మెల్యే కిడారి సర్వేశ్వరరావు, సివేరి సోమల హత్య కేసుల్లోనూ ఈయన కీలక పాత్రధారి. ఆయనపై ఆంధ్రప్రదేశ్‌లో 22 కేసులు నమోదై ఉన్నాయి. ప్రభుత్వం ఆయన తలపై రూ. 20 లక్షల రివార్డును కూడా ప్రకటించింది.

About The Author

Ram Narayana

See author's posts