సామాన్యులకు గుదిబండగా మారుతున్న రిజిస్ట్రేషన్ చార్జీలు… రియల్టర్స్ ఆందోళన
ప్రభుత్వం రిజిస్ట్రేషన్ చార్జీలు పెంచాలనే ప్రతిపాదన సామాన్యులకు గుదిబండగా మారిందని రియల్ ఎస్టేట్స్ అసోసియేషన్ రాష్ట్ర ప్రధాన కార్యదర్శి పగడాల రంగారావు విమర్శించారు . ఆరునెల్ల క్రితమే పెంచిన ప్రభుత్వం ఆదాయంకోసమే భూములు కనుగోలు అమ్మకాలపై విధించడం దారుణమని అభిప్రాయపడ్డారు . సోమవారం ఖమ్మం లో ఏర్పాటు చేసిన విలేకర్ల సమావేశంలో రాష్ట్ర ప్రభుత్వం రిజిస్ట్రేషన్ చార్జీలు పెంచాలనే ఆలోచన విరమించుకోవాలని డిమాండ్ చేశారు. ఈ సందర్భంగా రంగారావు మాట్లాడుతూ సర్కార్ రాబడి సామాన్లకు గుదిబండగా మారిందని , ఫ్లాట్లు , భూములు కొనుగోలు దారులకు కత్తిమీద సాములా ఉందని , స్థిరాస్తి వ్యాపారులకు పెనుభారంగా మారిందని , ఆరు నెలల క్రితమే పెంచిన ప్రభుత్వం మరల వెంటనే పెంచడం భావ్యం కాదన్నారు . చార్జీలను పెంచడం వల్ల మధ్య తరగతి , సామాన్య ప్రజలు సొంతిల్లు కలలను , కల్లలు గానే నిలిచిపోయాయని ఆందోళన వ్యక్తం చేశారు , చార్జీల పెంపుపై ప్రజలలో పూర్తి వ్యతిరేకత ఉందని , వారి రాబడి కోసం రియల్ ఎస్టేట్ రంగానికి ఈ విధంగా ఇబ్బంది పెట్టడం సరైంది కాదని విమర్శించారు . ధరణి తీసుకొచ్చి చాలా నష్టపర్చారని , ధరణి వల్ల సామాన్య రైతులకు , ప్రజలకు ఏ విధమైన ఉపయోగం లేదని అన్నారు . దాని ప్రభావం రియల్ ఎస్టేట్పై తీవ్రంగా పడిందని పేర్కొన్నారు . అయినా సరే అనేక రకాలుగా ఇబ్బందులు పడుతూ ముందుకు నెట్టుకుంటూ పోతుంటే రియల్ ఎస్టేట్ రంగాని నడ్డివిరస్తున్నారని అన్నారు . ప్రభుత్వానికి అతిపెద్ద ఆదాయం తీసుకువచ్చే రంగం రియల్ ఎస్టేట్ అని , వ్యవసాయం తర్వాత అనేక మందికి జీవనోపాధి కల్పించేది కనుక దానిని మనం కాపాడుకోవాలని అన్నారు . దీని వల్ల అనేక మంది లబ్ధి పొందారని అన్నారు . రియల్ ఎస్టేట్ రంగాన్ని నమ్ముకుని ఉన్న వాళ్లకు కరోనా మొదట వెవ్ లో , కరోనా రెండవ వేవ్ లో చాలా నష్టపోయామని పేర్కొన్నారు . పెంచిన ఛార్జీలను వెంటనే తగ్గించాలని లేని పక్షంలో రియల్టర్ అంతా ఒక్కటై రాష్ట్రం మొత్తం మీద ఒక పెద్ద ఉద్యమానికి పూనుకుంటామని , గతంలో ఎల్ఆర్ఎస్ మీద ఏ విధంగా చేశారో అదే విధంగా చేస్తారని హెచ్చరించారు . రియల్టర్స్ అసోసియేషన్ ఖమ్మం జిల్లా ప్రెసిడెంట్ అన్నం వీరప్రసాద్ మాట్లాడుతూ తెలంగాణ రాష్ట్ర ప్రభుత్వం రియల్ ఎస్టేట్ రంగాన్ని అతలాకుతలం చేయటానికే పూనుకున్నట్టు కనిపిస్తుందని ఆరోపించారు , ఆరు నెలల క్రితం ముప్పై శాతం పెంచిందని మరలా ఈసారి యాభై శాతం పెంచుతామని ప్రకటించడం ఎంత వరకు న్యాయమని ప్రశ్నించారు . సామాన్య ప్రజలు యాభై , వంద గజాలు కొనటానికి కూడా భయపడుతున్నారని అన్నారు . ప్రభుత్వం మరోసారి ఆలోచించి ఛార్జీలను పెంచడాన్ని ఉపసంహరించుకోవాలని కోరారు . ఈ కార్యక్రమంలో జిల్లా వైస్ ప్రెసిడెంట్ సామినేని విజయ్ కుమార్ , రఘునాథపాలెం మండలం ప్రెసిడెంట్ అబ్బగాని వెంకన్న , చింతకాని మండలం ప్రెసిడెంట్ కొడవకంటి మురళి బాబు , జిల్లా కమిటీ మెంబర్ బుర్రీ శ్రీనివాసరావు , బుర్రా సురేష్ బాబు , ఖమ్మం టౌన్ ట్రెజరర్ తదితరులు పాల్గొన్నారు .
