లేదంటే కనుసైగలతో పంపించేస్తా

• పాలేరులో లంచం తీసుకుని పోస్టింగ్ ఇవ్వడం ఉండదని చెప్పిన పొంగులేటి
• అధికారులను ఎవరినీ బదిలీ చేయమని.. వారు పద్ధతి మార్చుకోవాలని సూచన
• నమ్ముకున్న కార్యకర్తలను కాపాడుకుంటానన్న పొంగులేటి

పాలేరులో లంచం మాట వినకూడదు …అధికారులు పద్ధతులు మార్చుకోవాలి, వారిని కావాలని పంపించం…తప్పుడు పద్ధతులు అవలంబిస్తే చెప్పేది ఉండదు కేవలం కనుసైగలే …తట్టాబుట్టా సర్దుకోవాల్సిందే …ఇది ఎవరో అన్నమాటలు కాదు …సాక్షాత్తు రాష్ట్ర క్యాబినెట్ మంత్రి పొంగులేటి శ్రీనివాస్ రెడ్డి …ధరణిలో అనేక ఇబ్బందులు వస్తున్నాయి…ప్రతిఒక్కరికి న్యాయం చేసేందుకే ప్రభుత్వం ప్రయత్నం చేస్తుంది…అందువల్ల ఇది మన అందరి ప్రభుత్వం ప్రభుత్వం చెప్పిన విధంగా వాగ్దానాలు అమలు చేస్తుంది …ఆరు గ్యారంటీలను అమలు చేస్తుంది….త్వరలోనే సీఎం రేవంత్ రెడ్డి ద్వారా తీపి కబురు వినబోతున్నారు …నన్ను నమ్ముకున్న నా నియోజకవర్గ ప్రజలకు న్యాయం చేస్తా …అని అన్నారు …మొదటిసారిగా నియోజకవర్గంలో అధికారిక కార్యక్రమాల్లో పాల్గొన్న మంత్రి పొంగులేటిని అనేకమంది పార్టీ కార్యకర్తలు అభిమానులు కలుసుకొని పాలేరు నుంచి భారీ మెజార్టీతో ఎన్నిక అవ్వడమే కాకుండా రాష్ట్ర మంత్రి వర్గంలో కీలకమైన శాఖలకు మంత్రిగా భాద్యతలు చేపట్టడంపై మంత్రికి పలువురు అభినందనలు తెలిపారు …

అధికారులు తన జ్ఞానేంద్రియాలని… వారు ఒళ్లు దగ్గర పెట్టుకొని పని చేస్తే తనకు ఎలాంటి ఇబ్బంది ఉండదని తెలంగాణ మంత్రి పొంగులేటి శ్రీనివాస్ రెడ్డి అన్నారు. రాష్ట్రంలో ఎక్కడ ఎలా ఉన్నా పాలేరులో మాత్రం లంచం తీసుకొని పోస్టింగ్ ఇవ్వడం ఉండదని స్పష్టం చేశారు. అధికారులు కూడా రూపాయి ఆశించకుండా ప్రజలకు పనులు చేసి పెట్టాలని సూచించారు. అధికారులను ఎవరినీ బదిలీ చేయమని.. కానీ వారు పద్ధతి మార్చుకొని విధులు నిర్వహించాలని సూచించారు. లేదంటే.. కనుసైగతో వాళ్లంతట వాళ్లే వెళ్లే విధంగా చేస్తానన్నారు. తన పరిపాలనలో మాటలు ఉండవని, కేవలం కనుసైగలేనని హెచ్చరించారు. 

శనివారం పాలేరులోని కూసుమంచి మండలంలో జరిగిన ఓ కార్యక్రమంలో ఆయన పాల్గొన్నారు. ఈ సందర్భంగా మాట్లాడుతూ… ఎన్ని కుట్రలు పన్నినా… ఎన్ని శక్తులు ఎదురైనా మీ అందరి దీవెనలతో గెలిచానన్నారు. ఎన్నికల సమయంలో అనేక గ్రామాల్లో ఇచ్చిన వాగ్దానాలను త్వరలో పూర్తి చేస్తానని హామీ ఇచ్చారు. చాలామంది ధరణితో ఇబ్బందులు పడుతున్నారన్నారు. తనను నమ్ముకున్న ప్రతి ఒక్కరినీ కాపాడుకుంటానని హామీ ఇచ్చారు. నమ్ముకున్న కార్యకర్తకు అన్యాయం జరిగితే ఊరుకునేది లేదని వ్యాఖ్యానించారు. ఎన్నికల వరకే రాజకీయాలు అని.. తాము కక్షపూరిత రాజకీయాలకు పాల్పడమని స్పష్టం చేశారు. ముఖ్యమంత్రి రేవంత్ రెడ్డి నాయకత్వంలో ఆరు గ్యారెంటీలను వంద రోజుల్లో అమలు చేస్తామన్నారు. గతంలో కొంతమందిపై కేసులు పెట్టించారని.. వాటిని పరిష్కరిస్తానని హామీ ఇచ్చారు. రెండు మూడు రోజుల్లో ప్రజలు తీపి వార్త వింటారన్నారు.