- 500 బిలియన్ డాలర్ల కొనుగోళ్లపై ‘నిబద్ధత’ పదం ‘ప్రయత్నం’గా మార్పు
- పప్పుధాన్యాలపై సుంకాల తగ్గింపు అంశం తొలగింపు
- డిజిటల్ సేవల పన్ను ప్రస్తావనను పూర్తిగా తొలగించిన అమెరికా
- ఈ మార్పులపై ఎలాంటి అధికారిక వివరణ ఇవ్వని వైట్హౌస్
భారత్-అమెరికా మధ్య కుదిరిన మధ్యంతర వాణిజ్య ఒప్పందంపై విడుదల చేసిన అధికారిక ఫ్యాక్ట్షీట్లో వైట్హౌస్ నిశ్శబ్దంగా కీలక మార్పులు చేసింది. ఒప్పంద వివరాలు వెల్లడించిన కొన్ని రోజులకే ఈ సవరణలు చేయడం చర్చనీయాంశంగా మారింది. ముఖ్యంగా, భారత్ కొనుగోళ్లకు సంబంధించిన పదజాలాన్ని మార్చడంతో పాటు, కొన్ని వ్యవసాయ ఉత్పత్తులు, డిజిటల్ పన్నుల ప్రస్తావనను తొలగించింది.
తొలుత విడుదల చేసిన ఫ్యాక్ట్షీట్లో, అమెరికా నుంచి 500 బిలియన్ డాలర్ల విలువైన ఉత్పత్తులను కొనుగోలు చేసేందుకు భారత్ “నిబద్ధతతో ఉంది” (committed to buy) అని పేర్కొన్నారు. అయితే, సవరించిన వెర్షన్లో ఈ పదాన్ని “కొనుగోలు చేయాలని భావిస్తోంది” (intends to buy) అని మార్చారు. ఒప్పందంపై భారత్ వైపు నుంచి ఉన్న కట్టుబాటు తీవ్రతను ఈ మార్పు తగ్గించేలా ఉందని విశ్లేషకులు భావిస్తున్నారు.
దీంతో పాటు, అమెరికా నుంచి దిగుమతి చేసుకునే ఉత్పత్తులపై భారత్ సుంకాలు తగ్గిస్తుందన్న జాబితా నుంచి “కొన్ని రకాల పప్పుధాన్యాలు” అనే పదాన్ని తొలగించారు. ఇది భారత రైతులకు సంబంధించిన సున్నితమైన అంశం కావడంతో ఈ మార్పు ప్రాధాన్యం సంతరించుకుంది. అదేవిధంగా, భారత్ తన డిజిటల్ సేవల పన్నును తొలగిస్తుందన్న వాక్యాన్ని కూడా ఫ్యాక్ట్షీట్ నుంచి పూర్తిగా తొలగించడం గమనార్హం.
ఈ మార్పులను వైట్హౌస్ తన అధికారిక వెబ్సైట్లో ఎలాంటి ప్రకటన లేకుండా చేసింది. ఈ సవరణలకు గల కారణాలపై అమెరికా ప్రభుత్వం నుంచి ఎటువంటి అధికారిక వివరణ రాలేదు. దీంతో ఒప్పందంలోని అంశాలపై ఇరు దేశాల మధ్య అవగాహన విషయంలో స్పష్టత లోపించిందనే వాదనలు వినిపిస్తున్నాయి.
భారత మ్యాప్పై యూ-టర్న్… వివాదాస్పద పోస్ట్ను తొలగించిన అమెరికా!
- పీవోకే, అక్సాయి చిన్లతో కూడిన భారత మ్యాప్ను పోస్ట్ చేసిన అమెరికా
- భారత్తో వాణిజ్య ఒప్పందం ప్రకటనలో ఈ మ్యాప్ను జత చేసిన యూఎస్టీఆర్
- సోషల్ మీడియాలో తీవ్ర చర్చ జరగడంతో పోస్ట్ తొలగింపు
- వివరణ ఇవ్వకుండానే పోస్ట్ను డిలీట్ చేసిన అమెరికా ఏజెన్సీ
- అమెరికా విధానంలో మార్పు వచ్చిందన్న ఊహాగానాలకు తెర
భారత్కు సంబంధించిన ఓ వివాదాస్పద సోషల్ మీడియా పోస్ట్ను యునైటెడ్ స్టేట్స్ ట్రేడ్ రిప్రజెంటేటివ్ (USTR) కార్యాలయం తన అధికారిక ఎక్స్ ఖాతా నుంచి తొలగించింది. పాక్ ఆక్రమిత కశ్మీర్ (పీవోకే), అక్సాయి చిన్లను భారత్లో అంతర్భాగంగా చూపుతూ ప్రచురించిన మ్యాప్తో కూడిన ఈ పోస్ట్ తీవ్ర చర్చనీయాంశం కావడంతో అమెరికా ఈ నిర్ణయం తీసుకుంది.
గత వారం, భారత్-అమెరికా మధ్య కుదిరిన ఓ తాత్కాలిక వాణిజ్య ఒప్పందం గురించి ప్రకటిస్తూ యూఎస్టీఆర్ ఈ పోస్ట్ చేసింది. అయితే, ఈ ప్రకటనకు జత చేసిన మ్యాప్లో పూర్తి జమ్మూకశ్మీర్ను (పీవోకే, అక్సాయి చిన్లతో సహా) భారత్లో చూపించడం అందరి దృష్టినీ ఆకర్షించింది. సాధారణంగా వివాదాస్పద ప్రాంతాలను ప్రత్యేకంగా గుర్తించే అమెరికా ప్రభుత్వ వైఖరికి ఇది భిన్నంగా ఉండటంతో, దీనిపై సోషల్ మీడియాలో పెద్ద ఎత్తున చర్చ జరిగింది.
ఇది పొరపాటున జరిగిందా? లేక కశ్మీర్పై అమెరికా విధానంలో మార్పు వచ్చిందా? అనే దానిపై తీవ్రమైన ఊహాగానాలు చెలరేగాయి. ఈ నేపథ్యంలో, ఎటువంటి అధికారిక ప్రకటన చేయకుండా యూఎస్టీఆర్ సైలెంట్గా ఆ పోస్ట్ను తమ ఖాతా నుంచి తొలగించింది. పీవోకే, అక్సాయి చిన్ సహా పూర్తి జమ్మూకశ్మీర్, లడఖ్ తమ అంతర్భాగమని భారత్ ఎప్పటినుంచో స్పష్టం చేస్తున్న విషయం తెలిసిందే. కాగా, ఈ పోస్ట్ తొలగింపుపై యూఎస్టీఆర్ కార్యాలయం ఇప్పటివరకు ఎలాంటి వివరణ ఇవ్వలేదు.
