అమెరికా అధ్యక్షుడు డొనాల్డ్ ట్రంప్ ఆసుపత్రిలో చేరారంటూ సోషల్ మీడియాలో పెద్ద ఎత్తున సాగిన ప్రచారాన్ని వైట్హౌస్ తీవ్రంగా ఖండించింది. ఈ వార్తల్లో ఎలాంటి నిజం లేదని, అవన్నీ నిరాధారమైన వదంతులని స్పష్టం చేసింది.
శనివారం ఉదయం 11 గంటలకు వైట్హౌస్ ‘ప్రెస్ లిడ్’ ప్రకటించడంతో ఈ వదంతులు మొదలయ్యాయి. ఆ రోజు అధ్యక్షుడికి సంబంధించిన బహిరంగ కార్యక్రమాలు ఏవీ ఉండవని దీని అర్థం. ఇదే అదనుగా, ట్రంప్కు అస్వస్థతగా ఉందని, ఆయన్ను వాల్టర్ రీడ్ సైనిక ఆసుపత్రికి తరలించారని ఎక్స్ లో పోస్టులు వెల్లువెత్తాయి. దీనికి బలం చేకూరుస్తూ, ట్రంప్ కాన్వాయ్కు సంబంధించిన ఒక పాత వీడియోను వైరల్ చేశారు. అయితే, ఆ వీడియో 2024లో పెన్సిల్వేనియాలో ట్రంప్పై కాల్పులు జరిగిన తర్వాత ఆసుపత్రి నుంచి డిశ్చార్జ్ అయినప్పటిదని వాస్తవ తనిఖీలో తేలింది.
ఈ ప్రచారాన్ని వైట్హౌస్ కమ్యూనికేషన్స్ డైరెక్టర్ స్టీవెన్ చుంగ్ తోసిపుచ్చారు. “ట్రంప్ కంటే ఎక్కువగా అమెరికా ప్రజల కోసం పనిచేసిన అధ్యక్షుడు మరొకరు లేరు. ఈ ఈస్టర్ వారాంతంలో కూడా ఆయన వైట్హౌస్లో, ఓవల్ ఆఫీస్లో నిరంతరంగా పనిచేస్తున్నారు” అని ఆయన ఎక్స్లో పోస్ట్ చేశారు.
మరోవైపు, ట్రంప్ వైట్హౌస్లోనే ఉన్నారని చెప్పడానికి స్పష్టమైన ఆధారాలు కనిపించాయి. మధ్యాహ్నం 1:50 గంటలకు వెస్ట్ వింగ్ ద్వారం వద్ద మెరైన్ సైనికుడు కాపలాగా ఉన్నారని, ఇది అధ్యక్షుడు భవనంలోనే పనిచేస్తున్నారని చెప్పడానికి నిదర్శనమని సీబీఎస్ న్యూస్ జర్నలిస్ట్ తెలిపారు.
