ఛత్తీస్గఢ్-తెలంగాణ సరిహద్దులోని కర్రెగుట్ట కొండల్లో భారీ ఎన్కౌంటర్ జరిగింది. యాంటీ- మావోయిస్ట్ ఆపరేషన్లో 22 మంది మావోయిస్టులు మరణించినట్లు తెలుస్తోంది. ఈ ఆపరేషన్, ‘మిషన్ సంకల్ప్’, ‘ఆపరేషన్ కగార్’ పేరుతో ఏప్రిల్ 21న ప్రారంభమైంది. 16 రోజులుగా కొనసాగుతోంది. ఈ ఆపరేషన్లో ఛత్తీస్గఢ్ రాష్ట్ర పోలీసుల డిస్ట్రిక్ట్ రిజర్వ్ గార్డ్ (DRG), బస్తర్ ఫైటర్స్, స్పెషల్ టాస్క్ ఫోర్స్ (STF), కేంద్ర రిజర్వ్ పోలీస్ ఫోర్స్ (CRPF), CRPF కి చెందిన ఎలైట్ కౌంటర్-ఇన్సర్జెన్సీ యూనిట్ కోబ్రా (CoBRA) నుంచి సుమారు 24,000 మంది జవాన్లు పాల్గొంటున్నారు. కర్రెగుట్ట కొండలు ఛత్తీస్గఢ్లోని బిజాపూర్ జిల్లా, తెలంగాణలోని ములుగు జిల్లాల మధ్య సరిహద్దులో ఉన్నాయి. ఈ కొండలు దాదాపు 60 కిలోమీటర్ల పొడవునా విస్తరించి ఉన్నాయి. ఇవి దట్టమైన అడవులు, గుహలు, జలపాతాలతో ఉన్నాయి. ఈ ప్రాంతం దశాబ్దాలుగా మావోయిస్టుల అడ్డగా ఉంది. ప్రత్యేకించి పీపుల్స్ లిబరేషన్ గెరిల్లా ఆర్మీ (PLGA) బెటాలియన్ నంబర్ 1 దాక్కునేందుకు ఈ ప్లేస్ అనుకూలంగా మారింది.
