- వాషింగ్టన్ సమీపంలోని జాయింట్ బేస్ ఆండ్రూస్లో అనుమానాస్పద ప్యాకేజీ
- ప్యాకేజీలో తెల్లటి పౌడర్ ఉన్నట్లు గుర్తించిన సిబ్బంది
- పార్శిల్ తెరిచిన తర్వాత అనారోగ్యం పాలైన పలువురు
- ముందుజాగ్రత్త చర్యగా రెండు భవనాలను ఖాళీ చేయించిన అధికారులు
అమెరికాలోని అత్యంత కీలకమైన సైనిక స్థావరంలో తీవ్ర కలకలం రేగింది. వాషింగ్టన్ వెలుపల ఉన్న జాయింట్ బేస్ ఆండ్రూస్కు వచ్చిన ఒక అనుమానాస్పద ప్యాకేజీ కారణంగా పలువురు సిబ్బంది అస్వస్థతకు గురయ్యారు. ఆ ప్యాకేజీలో గుర్తుతెలియని తెల్లటి పౌడర్ ఉన్నట్లు సీఎన్ఎన్ తన కథనంలో పేర్కొంది. ఈ ఘటనతో అప్రమత్తమైన అధికారులు వెంటనే సహాయక చర్యలు చేపట్టారు.
సీఎన్ఎన్ కథనం ప్రకారం స్థావరంలోని ఒక భవనంలో ఓ వ్యక్తి ఈ ప్యాకేజీని తెరిచిన వెంటనే అందులో ఉన్నవారు అనారోగ్యం బారిన పడ్డారు. దీంతో అధికారులు తక్షణమే స్పందించి ఆ భవనంతో పాటు దానికి అనుసంధానంగా ఉన్న మరో భవనాన్ని కూడా ఖాళీ చేయించారు. “ముందుజాగ్రత్త చర్యగా ఆ ప్రాంతం చుట్టూ భద్రతా వలయాన్ని ఏర్పాటు చేశాం” అని జాయింట్ బేస్ ఆండ్రూస్ ఒక ప్రకటనలో తెలిపినట్లు సీఎన్ఎన్ వివరించింది. ప్యాకేజీని తెరిచిన భవనంలోనే ఎయిర్ నేషనల్ గార్డ్ రెడీనెస్ సెంటర్ కూడా ఉండటం గమనార్హం.
మేరీల్యాండ్లో ఉన్న ఈ జాయింట్ బేస్ ఆండ్రూస్ను అమెరికా అధ్యక్షులు తమ అధికారిక పర్యటనల కోసం విమానాలు ఎక్కడానికి తరచూ ఉపయోగిస్తుంటారు. ఇంతటి ప్రాముఖ్యమున్న స్థావరంలో ఈ ఘటన జరగడంతో భద్రతా వర్గాలు ఉలిక్కిపడ్డాయి. అస్వస్థతకు గురైన వారిని స్థావరంలోనే ఉన్న మాల్కమ్ గ్రోవ్ మెడికల్ సెంటర్కు తరలించి చికిత్స అందిస్తున్నారు. ఈ ఘటనపై ప్రస్తుతం ఉన్నత స్థాయి దర్యాప్తు కొనసాగుతోంది.
