- పాక్ అణ్వస్త్ర పరీక్షలు జరుపుతోందన్న డొనాల్డ్ ట్రంప్
- ట్రంప్ వ్యాఖ్యలను పరిగణనలోకి తీసుకున్నామన్న భారత్
- పాక్కు అక్రమ అణు కార్యకలాపాల చరిత్ర ఉందని వ్యాఖ్య
- ఏక్యూ ఖాన్ నెట్వర్క్, స్మగ్లింగ్ను ప్రస్తావించిన విదేశాంగ శాఖ
- రష్యా, చైనా కూడా పరీక్షలు చేస్తున్నాయన్న ట్రంప్
- తాము కూడా అణు పరీక్షలు చేయాల్సి ఉంటుందని వెల్లడి
పాకిస్థాన్ అణ్వస్త్ర పరీక్షలు నిర్వహిస్తోందంటూ అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలను భారత్ పరిగణనలోకి తీసుకుంది. ఈ విషయంలో పాకిస్థాన్కు అక్రమ, రహస్య అణు కార్యకలాపాల చరిత్ర ఉందని భారత విదేశాంగ శాఖ స్పష్టం చేసింది. పాక్ అణు కార్యక్రమంపై మొదటి నుంచి ఉన్న అనుమానాలను ట్రంప్ వ్యాఖ్యలు బలపరిచేలా ఉన్నాయని పేర్కొంది.
శుక్రవారం మీడియా సమావేశంలో విదేశాంగ శాఖ ప్రతినిధి రణధీర్ జైస్వాల్ మాట్లాడుతూ.. “దశాబ్దాల తరబడి సాగుతున్న స్మగ్లింగ్, ఎగుమతి నియంత్రణ ఉల్లంఘనలు, రహస్య భాగస్వామ్యాలు, ఏక్యూ ఖాన్ నెట్వర్క్, అణ్వస్త్ర వ్యాప్తి వంటివి పాకిస్థాన్ చరిత్రలో భాగమే. పాకిస్థాన్ రికార్డుకు సంబంధించిన ఈ అంశాలను భారత్ ఎప్పటినుంచో అంతర్జాతీయ సమాజం దృష్టికి తీసుకెళుతోంది. ఈ నేపథ్యంలోనే ట్రంప్ వ్యాఖ్యలను మేము గమనించాం” అని తెలిపారు.
ఇటీవల సీబీఎస్ న్యూస్కు ఇచ్చిన ఒక ఇంటర్వ్యూలో ట్రంప్ ఈ వ్యాఖ్యలు చేశారు. రష్యా, చైనా, ఉత్తర కొరియాతో పాటు పాకిస్థాన్ కూడా అణ్వస్త్ర పరీక్షలు నిర్వహిస్తున్నాయని, అందుకే అమెరికా కూడా పరీక్షలు జరపాల్సి ఉంటుందని ఆయన పేర్కొన్నారు.
గత 30 ఏళ్లలో తొలిసారిగా అమెరికా అణుబాంబులను పేల్చి పరీక్షించనుందా అని అడిగిన ప్రశ్నకు ఆయన ఈ విధంగా బదులిచ్చారు. ఈ దేశాలు ఎక్కడ పరీక్షలు చేస్తున్నాయో తమకు కచ్చితంగా తెలియదని, కానీ భూగర్భంలో ఈ పరీక్షలు జరుగుతున్నాయని ట్రంప్ తెలిపారు. “వాళ్లు భూమి లోపల పరీక్షలు చేస్తుంటారు. దానివల్ల ఏం జరుగుతుందో ప్రజలకు సరిగ్గా తెలియదు. చిన్న ప్రకంపనలు మాత్రమే వస్తాయి. వాళ్లు పరీక్షలు చేస్తున్నారు, మనం చేయడం లేదు. మనం కూడా కచ్చితంగా పరీక్షించాలి” అని ఆయన వ్యాఖ్యానించారు.
