- అమెరికాలో కీలక చట్టాలు చేయాలంటూ కాంగ్రెస్కు ట్రంప్ పిలుపు
- సరిహద్దు భద్రత, ఓటర్ ఐడీపై కఠిన నిబంధనల ప్రతిపాదన
- అక్రమ వలసదారులకు డ్రైవింగ్ లైసెన్సులు రద్దు చేయాలని డిమాండ్
- హెల్త్కేర్, ఇన్సైడర్ ట్రేడింగ్పై కొత్త చట్టాలు తీసుకురావాలని ఒత్తిడి
అమెరికా అధ్యక్షుడు డొనాల్డ్ ట్రంప్.. దేశీయంగా పలు కీలక చట్టాలను తీసుకురావాలని కాంగ్రెస్పై తీవ్ర ఒత్తిడి తెచ్చారు. తన రెండోసారి అధ్యక్ష పదవిలో భాగంగా తొలిసారి చేసిన ‘స్టేట్ ఆఫ్ ది యూనియన్’ ప్రసంగంలో సరిహద్దు భద్రత, ఓటర్ ఐడీ, హెల్త్కేర్తో పాటు పలు అంశాలపై సంచలన ప్రతిపాదనలు చేశారు. రికార్డు స్థాయిలో 1 గంట 47 నిమిషాల పాటు ఆయన ప్రసంగం కొనసాగింది.
సరిహద్దు భద్రత, హోంల్యాండ్ సెక్యూరిటీకి సంబంధించిన నిధులను తక్షణమే పూర్తిగా పునరుద్ధరించాలని ట్రంప్ డిమాండ్ చేశారు. నేరస్థులకు రక్షణ కల్పిస్తున్న ‘శాంచురీ నగరాల’ను అంతం చేయాలని, అక్రమ వలసదారులను దేశం విడిచి పంపకుండా అడ్డుకుంటున్న అధికారులపై కఠిన చర్యలు తీసుకోవాలని కోరారు. అక్రమ వలసదారులకు వాణిజ్య డ్రైవింగ్ లైసెన్సులు జారీ చేయకుండా నిరోధించేందుకు ‘డెలీలా చట్టం’ తీసుకురావాలని ప్రతిపాదించారు.
ఎన్నికల వ్యవస్థపైనా ట్రంప్ కీలక వ్యాఖ్యలు చేశారు. “సేవ్ అమెరికా చట్టం” ద్వారా అక్రమ వలసదారులు ఓటు వేయకుండా ఆపాలని అన్నారు. ఓటు వేయాలంటే ప్రతి ఒక్కరూ ఓటర్ ఐడీ, పౌరసత్వ రుజువు తప్పనిసరిగా చూపించాలని స్పష్టం చేశారు. అనారోగ్యం, వైకల్యం, సైనిక సేవ, ప్రయాణంలో ఉన్నవారు మినహా ఇతరులకు మెయిల్-ఇన్ బ్యాలెట్లను రద్దు చేయాలని డిమాండ్ చేశారు.
హెల్త్కేర్ రంగంలో తాను తెచ్చిన ఔషధ ధరల తగ్గింపు విధానాన్ని చట్టబద్ధం చేయాలని కోరారు. ఇన్సూరెన్స్ కంపెనీలకు చెల్లింపులు ఆపి, ఆ డబ్బును నేరుగా ప్రజలకే ఇవ్వాలని సూచించారు. కాంగ్రెస్ సభ్యులు అంతర్గత సమాచారంతో లాభపడకుండా “స్టాప్ ఇన్సైడర్ ట్రేడింగ్ యాక్ట్” తేవాలని, వాల్స్ట్రీట్ సంస్థలు పెద్ద ఎత్తున ఇళ్లను కొనుగోలు చేయకుండా శాశ్వత నిషేధం విధించాలని కోరారు.
ట్రంప్ ప్రసంగంలోని వలస విధానాలు, వీసాలకు సంబంధించిన అంశాలను భారతీయ వర్గాలు నిశితంగా గమనిస్తున్నాయి. సరిహద్దు భద్రత, డాక్యుమెంటేషన్ నిబంధనలలో మార్పులు జరిగితే అమెరికాలోని భారతీయ విద్యార్థులు, నైపుణ్యం కలిగిన ఉద్యోగులు, ప్రవాస భారతీయులపై ప్రభావం చూపే అవకాశం ఉందని విశ్లేషకులు భావిస్తున్నారు.
