తమపై ఆంక్షలు విధించిన శత్రువులు విజయం సాధించలేరని ఇరాన్ అణు ఇంధన సంస్థ అధిపతి మొహమ్మద్ ఎస్లామీ అన్నారు. కాల్పుల విరమణ ప్రతిపాదనల్లో యురేనియం శుద్ధి అంశాన్ని అమెరికా వ్యతిరేకిస్తోంది. ఈ నేపథ్యంలో ఆయన మాట్లాడుతూ, అణు ఇంధనాన్ని పరిరక్షించుకోవడం తమ హక్కు అని స్పష్టం చేశారు. ఇరాన్ హక్కుల పరిరక్షణ అత్యవసరమని వ్యాఖ్యానించారు.
అమెరికాతో జరిపే ఎటువంటి కాల్పుల విరమణ చర్చల్లోనూ తమ హక్కుల పరిరక్షణే అత్యవసర అంశంగా ఉండాలని చెప్పారు. తమపై ఆంక్షలు విధిస్తే అంగీకరించేది లేదని స్పష్టం చేశారు. రెండు రోజుల క్రితం అమెరికా, ఇరాన్ దేశాలు కాల్పుల విరమణకు అంగీకరించిన విషయం తెలిసిందే. అయితే లెబనాన్పై ఇజ్రాయెల్ దాడితో ఉద్రిక్త పరిస్థితులు తిరిగి తలెత్తాయి.
ఇరాన్తో చర్చల్లో మధ్యవర్తిగా పాకిస్థాన్… ఇజ్రాయెల్ రాయబారి కీలక వ్యాఖ్యలు
ఇరాన్తో చర్చలు జరిపేందుకు అమెరికా తన సొంత కారణాలతో పాకిస్థాన్ను మధ్యవర్తిగా ఉపయోగించుకుంటోందని భారత్లోని ఇజ్రాయెల్ రాయబారి రూవెన్ అజార్ గురువారం కీలక వ్యాఖ్యలు చేశారు. పశ్చిమాసియాలో యుద్ధాన్ని ముగించే 15 సూత్రాల ప్రణాళిక అమలు జరుగుతున్నంత కాలం, అమెరికా నిర్ణయాన్ని తాము విశ్వసిస్తామని ఆయన స్పష్టం చేశారు. ఐఏఎన్ఎస్ వార్తా సంస్థకు ఇచ్చిన ప్రత్యేక ఇంటర్వ్యూలో ఆయన ఈ విషయాలు వెల్లడించారు.
అమెరికా రూపొందించిన 15 సూత్రాల ప్రణాళికను ఇరాన్కు చేరవేయడానికి, ఆ దేశం నుంచి వచ్చే ప్రతిస్పందనలను స్వీకరించడానికి వైట్హౌస్ పాకిస్థాన్ను ఒక మాధ్యమంగా వాడుకుంటున్నట్లు గతంలో పలు నివేదికలు వచ్చాయి. ఈ నేపథ్యంలో అజార్ మాట్లాడుతూ, “ఈ యుద్ధంలో పాకిస్థాన్ ప్రత్యక్షంగా పాల్గొనకపోయినా, సానుకూల పాత్ర పోషించలేదు. అయినప్పటికీ, అమెరికా వారిని మధ్యవర్తిగా ఎంచుకుంది. ఆ నిర్ణయంపై మాకు నమ్మకం ఉంది” అని తెలిపారు.
ఇరాన్పై తమ సైనిక చర్య ముగిసిందని, ఇప్పుడు దౌత్యానికి అవకాశం ఇస్తున్నందుకు సంతోషంగా ఉందని అజార్ చెప్పారు. “ఒకవేళ ఇరాన్ కాల్పుల విరమణను ఉల్లంఘించినా లేదా మళ్లీ రెచ్చగొట్టే చర్యలకు పాల్పడినా ఎదుర్కోవడానికి మా బలగాలు సిద్ధంగా ఉన్నాయి” అని ఆయన హెచ్చరించారు. ఇరాన్ అణుబాంబును తయారు చేసే సామర్థ్యాన్ని పూర్తిగా నాశనం చేశామని, వారి అణు కార్యక్రమాన్ని ఏళ్ల తరబడి వెనక్కి నెట్టేశామని నొక్కి చెప్పారు.
ప్రస్తుతం ఇరాన్ ప్రభుత్వంలో అంతర్గత విభేదాలు కనిపిస్తున్నాయని అజార్ విశ్లేషించారు. నాయకత్వానికి, ఐఆర్జీసీకి మధ్య పొంతన లేదని, ఇది ఆ దేశంలోని అస్థిరతకు నిదర్శనమని ఆయన పేర్కొన్నారు.
